چھل توں متاثرہ تریمتیں، ٻال، انہاں دی خوراک، تعلیم تے تربیت اتے بحالی کیتے خصوصی اقدامات کیتے ونجن، صدر مملکت ڈاکٹر عارف علوی دا نوابشاہ اچ چھل متاثرین کیتے ریلیف کیمپ دا دورہ

اسلام آباد۔15ستمبر (اے پی پی) صدر مملکت ڈاکٹر عارف علوی مخیر حضرات توں چھل متاثرین دی ٻئی امداد دی اپیل کریندیں ہوئیں آکھیا جو چھل توں متاثرہ تریمتیں، ٻال، انہاں دی خوراک، تعلیم تے تربیت اتے بحالی کیتے خصوصی اقدامات کیتے ونجن۔ عالمی برادری کوں پاکستان اچ موسمیاتی تبدیلی پاروں نقصانات دے ازالے کیتے پورا حصہ پاوݨا چاہیدے۔ خمیس کوں ایوان صدر دے پریس ونگ توں جاری بیان موجب صدر مملکت ڈاکٹر عارف علوی نوابشاہ اچ سیلاب زدگان کیتے ریلیف کیمپ دا دورہ کیتا۔ صدرمملکت ولوں پنجاب حکومت دے تعاون نال نوابشاہ دی چھل زدگان دی مدد کیتے پنج کروڑ روپے دی امداد دا اعلان کیتا۔ صدرمملکت نوابشاہ اچ چھل توں تھیوݨ آلے نقصانات دا فضائی جائزہ وی ڳھدا۔ صدر مملکت ڈاکٹر عارف علوی آکھیا جو چھل پاروں ٻئے علاقیاں اچ اتے خصوصی طور سندھ اچ وݙی تباہی تھئی اے۔ شاید اے سندھ دی تاریخ دا ساریاں توں وݙا سیلاب اے۔ ماحولیاتی تبدیلی اتے عالمی درجہ حرارت اچ ودھارے پاروں پاکستان اچ وݙا سیلاب آیا۔ عالمی درجہ حرارت اچ ودھارے اچ پاکستان دا حصہ نہ ہووݨ دے برابر اے پر پاکستان متاثر تھیوݨ آلےملکاں اچوں ساریاں توں اتے اے۔ عالمی برادری کوں پاکستان اچ موسمیاتی تبدیلی پاروں تھیوݨ آلے ضیان دے ازالے کیتے حصہ پاوݨا چاہیدے۔