اسلام آباد۔20ستمبر (اے پی پی) وفاقی وزیر منصوبہ بندی، ترقی ،اصلاحات تے خصوصی اقدامات اتے ڈپٹی چیئرمین این ایف آر سی سی احسن اقبال آکھیا جو ݙو تہائی پاکستانی ہک تہائی چھل متاثرہ لوکاں دی دل کھول تے مدد کرن، کوئی وی آفت یا آزمائش کہیں قوم کیتے وݙا امتحان ہوندی اے تاں ݙوجھے پاسوں ہک موقع وی ݙیندی اے۔ ایں آفت کوں موقع بݨا تے آپݨے اندر اعتماد پیدا کروں اتے ایں آفت دے سامھے اساݙی صلاحیت اتے مضبوط اے۔ علما کرام منبر تے محراب دے ذریعے وی لوکاں اچ مدد دا جذبہ ابھارن، حکومت فیصلہ کیتے جو ملک دی یونیورسٹیاں اچ پڑھݨ آلے پنجوی لکھ طلباء تے طالبات ہک مدر اینڈ چائلڈ نیوٹریشن پیک ٻݨا تے متاثرہ علاقیاں اچ بھجویسوں۔ صوبائی حکومتاں نال رَل تے ’’ ایڈاپ اے ڈسٹرکٹ ‘‘پروگرام شروع کریندے پیوں۔ چھل توں بچ ونجݨ آلے ضلعیاں دے ہک متاثرہ ضلعے دے انتظامات ہک مہینے کیتے سنبھال ڳھنسن، جݙاں تئیں اساݙا چھیکڑی پاکستانی آپݨے گھر اچ وس نی ویندا اساں چین نال نہ ٻہسوں۔ او منگل کوں این ایف آر سی سی اچ چیئرمین این ڈی ایم اے لیفٹیننٹ جنرل اختر نواز اتے نیشنل کوآرڈینیٹر این ایف آر سی سی میجر جنرل ظفر اقبال دے رلے پریس کانفرنس نال خظاب کریندے پئے ہن۔ وفاقی وزیر احسن اقبال آکھیا جو این ایف آر سی سی اچ حکومت دی سطح تے وفاقی ،صوبائی حکومتاں، مسلح افواج ، سول سوسائٹی اتے بین الاقوامی اداریاں دے تعاون نال فلڈ رسپانس تے مربوط کم تھیندا پئے۔ انہاں آکھیا جو پاݨٰی دی نکاسی سست ہووݨ آلے علاقیاں ، بلوچستان دے پہاڑی علاقے اچ شدید بارشاں، خیبرپختونخواہ اچ بارشاں نال تباہی تھئی اے۔ پاݨی دا ہک وݙا سمندر بلوچستان دے مشرقی ضلعے اچ کھڑے۔ انہاں آکھیا جو پاکستان دا ہک تہائی حصہ سیلاب توں متاثر تھیے، 33 ملین لوک متاثر تھین، 1500 لوکاں دی جاناں ڳن، اٹھ لکھ مویشیاں دا وݙا نقصان تھیے۔ انہاں آکھیا جو اساݙی کوشش اے جو ودھ توں ودھ موبائل کلینک اتے میٹرنٹی سینٹر ٻݨائے ونجن۔ انہاں آکھیا حکومت فیصلہ کیتے جو ملک دی یونیورسٹیاں اچ پڑھݨ آلے پنجوی لکھ طلباء تے طالبات ہک مدر اینڈ چائلڈ نیوٹریشن پیک ٻݨا تے متاثرہ علاقیاں اچ بھجویسوں۔ صوبائی حکومتاں نال رَل تے ’’ ایڈاپ اے ڈسٹرکٹ ‘‘پروگرام شروع کریندے پیوں۔ چیئرمین این ڈی ایم اے لیفٹیننٹ جنرل اختر نواز آکھیا جو سندھ اتے بلوچستان اچ ٻہوں نقصان تھیے، کوئی وی ملک کلھا ایجھی مشکلات نی سہہ سڳدا، حالات پاروں حکومت پاکستان اقوام متحدہ نال توں امداد دی اپیل کیتی اے، اقوام متحدہ دے سیکرٹری جنرل پاکستان دا دورہ کیتا اتے عالمی برادری توں امداد دی اپیل کیتی اے جئیں پاروں دوست ملکاں توں ریلیف سامان آوݨا شروع تھی ڳئے۔
