شیخ سلطان آرمی ریلیف فنڈ اچ 2.5 ملین ڈالر دا عطیہ ݙتے ، آئی ایس پی آر

راولپنڈی۔25ستمبر (اے پی پی):دبئی پورٹ ورلڈ(عالمی سطح تے ساریں توں وݙے پورٹ آپریٹرز اچوں ھک) دے چیئرمین شیخ احمد سلطان بن سلیم اتوار کوں بری فوج دے سربراہ جنرل قمر جاوید باجوہ نال ملاقات کیتی۔ پاک فوج دے شعبہ تعلقات عامہ (آئی ایس پی آر)دی طرفوں اتوار کوں جاری بیان اچ آکھیے ڳئے جو ملاقات اچ تباہ کن سیلاب دے تناظر اچ امدادی کوششاں تے پاکستان کیتے بحالی دے ممکنہ اقدامات تے وی ڳالھ مہاڑ کیتی ڳئی ۔شیخ سلطان، جنہاں ایں توں پہلے سندھ اچ سیلاب توں متاثرہ علاقیں دا دورہ کیتا ہئی ، آرمی ریلیف فنڈ کیتے 2.5 ملین امریکی ڈالر دا عطیہ ݙتے ۔انہاں سیلاب توں متاثرہ علاقیں اچ پاک فوج دی امدادی کوششاں دی تعریف کریندے ہوئیں آکھیے جو متحدہ عرب امارات اتے ایندی قیادت اوکھے ویلھے اچ پاکستانی عوام دے نال کھڑی اے۔ معزز مہمان پاکستان کیتے ماحولیاتی انصاف دے معاملے کوں عالمی فورمز تے چاوݨ دا عزم کیتے ۔آرمی چیف آکھیے جو شیخ سلطان دا پاکستان کیتے ودھ ساری وختی تعاون تے شکریہ ادا کیتے تے پاکستان اچ اقتصادی ترقی دے امور تے ڳالھ مہاڑ کیتی ۔ شیخ سلطان آرمی چیف کوں دبئی پورٹ ورلڈ دی پاکستان اچ مزید سرمایہ کاری اچ دلچسپی بارے ݙسایا ۔ شیخ سلطان آوݨ آلے ݙینھاں اچ سیلاب توں نجات دیاں کوششاں کیتے ݙوجھے عطیہ دہندگان کوں گھن آوݨ دی پیشکش کیتی۔ شیخ سلطان ایں دورے دا اہتمام کرݨ تے پاکستان اچ مدد دی لوڑھ بارے متحدہ عرب امارات اچ آگاہی پیدا کرݨ تے فخر عالم ستارہ امتیاز دا شکریہ ادا کیتے۔