وزیراعظم شہبازشریف دا دادو دی وستی جھاکرو اچ چھل متاثرین دی خیمہ وستی دا دورہ، سہولتاں دا جائزہ ڳھدا

دادو۔27ستمبر (اے پی پی) وزیراعظم محمد شہبازشریف ضلع دادو دی وستی جھاکرو اچ چھل متاثرین دی خیمہ وستی دا دورہ، سہولتاں دا جائزہ ڳھدا۔ ایں موقع تے وزیر اعلیٰ سندھ مرادعلی شاہ وی موجود ہن۔ وزیراعظم کوں ضلع دادو اچ چھل پاروں تھیوݨ آلے نقصان، امدادی کماں اتے بحالی دے اقدامات بارے تفصیلی بریفنگ ݙتی ڳئی۔ وزیراعظم کوں ݙسیا ڳیا جو چھل پاروں ضلع اچ ہݨ تئیں 37 بندے جاں بحق اتے 22 زخمی تھین۔ زخمیاں دی تعداد ہر ݙینھ ودھدی ویندی اے۔ ایندے علاوہ لکھاں ایکڑ تے چاول اتے ٻئی کھڑی فصلاں تباہ تھی ڳئن۔ لکھاں زناور وی وہہ ڳئن۔ چھل دا پاݨی کھڑا تھیوݨ پاروں کنڑک دی فصل تاخیر دا شکار اے۔ پاݨی کݙھݨ کیتے اقدامات کیتے ویندے پئن اتے امید اے جو اٹھ توں ݙاہ ݙینھ اچ پاݨی کݙھ ڳھدا ویسی۔ وزیراعظم کوں ݙسیا ڳیا جو چھل متاثرین کیتے پورے ضلعے اچ 17 خیمہ وستیاں اتے ݙو سو توں ودھ کیمپ لاتے ڳئن۔ 215 توں ودھ امدادی کیمپ لاتے ڳئن۔ مسلح فوج اتے سول ادارے دے اہلکار ریسکیو،ریلیف اتے بحالی دے عمل اچ رَل تے کم کریندے پئن اتے امدادی کیمپاں اچ متاثرین کوں ساری سہولتاں ݙتی ویندی پئن۔ ایں موقع تے وزیراعظم متاثرہ ٻالاں کوں بہترین تعلیمی سہولتاں ݙیوݨ کیتے سمارٹ سکول ٻݨاوݨ دا وی اعلان کیتا۔ وزیراعظم آکھیا جو اے خوشی دی ڳالھ اے جو چھل متاثرین دی مدد کیتے سارے رَل تے کم کریندے پئن۔ وزیراعظم چھل متاثرین دے ریسکیو، ریلیف اتے بحالی دے کماں دی تعریف کیتی۔