روپے دی قدر اچ استحکام ، مہنگائی و شرح سود اچ کمی حکومت دی ترجیحات ہن،تاریخ ساݙی معاشی کارکردگی دی گواہ اے، وفاقی وزیر خزانہ سینیٹراسحاق ڈار

اسلام آباد۔28ستمبر(اے پی پی) وفاقی وزیر خزانہ سینیٹراسحاق ڈار آکھیے جو ڈالر دے مقابلے روپے دی قدر اچ استحکام اتے مہانگ و شرح سود اچ کمی حکومت دی ترجیحات ہن، اساں محض زبانی دعویں تے یقین نی رکھیندے بلکہ تاریخ ساݙی معاشی کارکردگی دی گواہ اے،عمران خان ملکی معیشت کوں ناقابل تلافی ضیان پڄے ،عمران خان پاکستان دا او حال کیتے جیڑھا کوئی دشمن وی نی کرسڳدا ، پی ٹی آئی دی سابقہ حکومت دی بدانتظامی دی وجہ توں ملک ایں ویلھے بدترین معاشی بحران دا شکار اے، سابق پی ٹی آئی حکومت جیڑھا گند چھوڑیے او چھی مہینے صاف نی تھی سڳدا ،وزیر خزانہ مفتاح اسماعیل دی کوششاں دی وجہ توں ہی ملک ڈیفالٹ توں بچ ڳئے ۔اے ڳالھ انہاں وزارت خزانہ دے باہرمیڈیا نال ڳالھ مہاڑ آکھی اے۔ انہاں آکھیے جو پاکستان دی عوام کیتے بارودی سرنگاں وچھائن ،عمران خان اپݨے کرتوتاں تے اللہ توں معافی منگو،کجھ خدا توں ݙرو تے پاکستان کوں چلݨ ݙیو ۔اسحاق ڈار گزریل ݙو ݙینھ دے دوران روپے دی قدراچ ودھارے تے اطمینان دا اظہار کریندے ہوئیں آکھیے جو ایں توں ساݙے قرضے گھٹ تھئن ۔اسحاق ڈار افسوس دا اظہار کیتے جو پی ٹی آئی حکومت اپݨے چیکھڑی ݙینھ سیاسی فیدہ چاوݨ کیتے بین الاقوامی معاہدیں دی خلاف ورزی کیتی۔ انہاں آکھیے جو گزریل 34 سال توں مسلسل ٹیکس ادا کرݨ آلے ہن ۔ انہاں آپݨے ٹیکس گوشواریں اچ کݙاہیں تاخیر نی کیتی ۔ انہاں آکھیے جو پچھلی حکومت وی انہاں دا پاسپورٹ منسوخ کرݙتا ہئی تے اے موجودہ مخلوط حکومت ہئی جیں انہاں کوں پاسپورٹ جاری کیتا ہئی۔ انہاں آکھیے جو قیاس آرائی کرݨ آلیں مقامی کرنسی توں کھیڈݨ دی اجازت نہ ݙتی ویسی ۔ انہاں ایں تاثر کوں مسترد کیتے جو مسلم لیگ (ن) دی حکومت 2013 توں 2018 دے دوران اپݨے دور اچ روپے دی قدر کوں ودھ رکھݨ کیتے مارکیٹ اچ ڈالر انجیکٹ کیتے ۔انہاں آکھیے جو اساں زرمبادلہ دے ذخائر کوں 23 ارب ڈالر دی ریکارڈ سطح تے گھن ڳئے ۔انہاں آکھیے جو اساں مارکیٹ اکانومی تے یقین رکھیندوں ، اے مسلم لیگ ن دی حکومت ہئی جیں مارکیٹ بیسڈایکسچینج ریٹ متعارف کرایا ہئی ۔ اسحاق ڈار آکھیے جو ملک کوں اوکھے چیلنجز دا سامݨا اے لیکن ماضی وانڳوں نبݨیا ویسی ۔ انہاں دی وجہ توں پاکستان نادہندہ تھیوݨ توں بچ ڳئے ، او ساݙی معاشی ٹیم دا حصہ رہسن،4سال دی خراب معیشت کوں چھی مہینے اچ ٹھیک نی کیتا ونڄ سڳدا ،سیاست کوں ھک پاسے رکھ تے ملکی مفاد کیتے کم کرݨا ہوسی۔ماضی اچ معیشت دے نال جیڑھا کجھ تھے سارا ڄاݨدوں ،ساݙے دور اچ مستحکم معیشت دا گزریل حکومت بیڑہ غرق کیتے، اساکوں مشکل چیلنجز دا سامݨا اے ،اساں کم کریسوں ،کامیابی اللہ ݙیسی۔