چین دی پاکستانی سیلاب متاثرین کیتے امدادی کارروائیاں بے مثال ہن، پاکستانی سفیر منیر اکرم

نیویارک ۔29ستمبر (اے پی پی):پاکستان آکھیے جو چین دی ملک دے سیلاب زدگان کیتے امدادی کوششاں بے مثال ہن۔ پاکستان دے سفیر منیر اکرم اقوام متحدہ اچ چینی سفیر ژانگ جون دی میزبانی اچ منعقدہ ھک ورچوئل استقبالیہ توں خطاب کریندے ہوئیں پاکستان دے سیلاب زدہ لوکاں دی مدد کیتے چین دے کردار دی تعریف کریندے ہوئیں آکھیے جو اوکھے ویلھے اچ چین دی پاکستان دی طرفوں مدد بے مثال اے تے او چین دی پاکستان دی طرفوں مستقل حمایت کوں ثابت کریندن ۔ انہاں آکھیے جو چین 30 سالاں اچ لازوال ترقی کیتی خاص طور تے 700 ملین لوکاں کوں غربت توں کڈھیے ، انہاں مزید آکھیے جو چین دیاں پالیسیاں اقوام متحدہ دے چارٹر دے اصولاں، کثیرالجہتی دی حمایت تے مبنی ہن تے معاشی، سماجی، سائنسی اتے تکنیکی شعبیں اچ چین دی غیر معمولی کامیابیاں ایندے رہنماواں دی بصیرت اتے دانشمندی دی عکاسی کریندن ، انہاں واضح کیتے جو چین اتے پاکستان قابل اعتماد دوست ہن ۔ سفیر اکرم ایں ڳالھ کوں چیندے ہوئیں آکھیے جو سی پیک (چین پاکستان اقتصادی راہداری) سانجھے تعاون دی بہترین مثال اے۔انہاں آکھیے جو بی آر آئی (بیلٹ اینڈ روڈ انیشیٹو)، گلوبل ڈویلپمنٹ انیشیٹو (جی ڈی آئی) اتے ٻئے میکانزم دے ذریعے، چین پوری دنیا اچ خوشحالی کوں وسعت ݙیوݨ کیتے سارے ترقی پذیر ملکاں دی حمایت کریندے۔