دل دے امراض نال تھیوݨ آلی اموات دی شرح کوں ڳھٹ کرݨ کیتے عوام اچ آگاہی ݙیوݨ دی لوڑھ اے، صدر مملکت ڈاکٹر عارف علوی دا سمپوزیم توں خطاب

اسلام آباد۔29ستمبر (اے پی پی) صدر مملکت ڈاکٹر عارف علوی امراض قلب دی شرح کوں ڳھٹ کرݨ کیتے عوام اچ آگاہی ݙیوݨ دی لوڑھ تے زور ݙیندیں ہوئیں آکھیا جو احتیاط کرݨ نال بیماری دے خطر کوں ڳھٹ کرݨ اچ مدد مل سڳدی اے جئیں نال قومی صحت دی ݙیکھ بھال دے نظام تے ٻوجھ ڳھٹ تھیسی۔ صدرمملکت اے ڳالھیں خمیس کوں ایوان صدر اچ اسلام آباد دے ہک نجی ہسپتال ولوں ”ورلڈ ہارٹ ڈے – 2022“ دی مناسبت نال تھیوݨ آلے سمپوزیم نال خطاب کریندیں ہوئیں آکھی۔ تقریب اچ نامور طبی ماہرین اتے ٻئی اہم شخصیات وی شریک تھئی۔ ایں سال ورلڈ ہارٹ ڈے کوں ، ہر دل کیتے دل دا اسعتمال، دی تھیم نال منایا ویندا پئے جئیں دا مقصد لوکاں کوں مختلف انداز اچ سوچݨ، درست فیصلے کرݨ، ݙوجھیاں دی مددکرݨ اتے ہر دل کیتے قلبی صحت اچ مدد کرݨ کیتے ودھ توں ودھ لوکاں تئیں پڄاوݨ دی ترغیب ݙیوݨ اے۔