قوم کوں کٹھے کھڑا تھیوݨا ہوسی ، جیں پارلیمان توں ٻہر دا رستہ چݨیے او سیاست توں ٻہر تھی ویندے ، سیلاب جیڑھی تباہی مچائی اے ایں تے ایوان اچ ڳالھ تھیوݨی چاہیدی اے سید خورشید احمد شاہ

اسلام آباد۔7اکتوبر(اے پی پی) وفاقی وزیر آبی وسائل سید خورشید احمد شاہ آکھیے جو پاکستان لڑائیاں اتے اختلافات دا متحمل نی تھی سڳدا قوم کوں کٹھے کھڑا تھیوݨا پوسی، جیں پارلیمان توں ٻہر دا رستہ چݨیے او سیاست توں ٻہر تھی ویندے ، سیلاب تے ایوان اچ تفصیلی بحث تھیوݨی چاہیدی اے ، قومی اسمبلی اچ ڳالھ کریندے ہوئیں انہاں آکھیے جو سیلاب جیڑھی تباہی مچائی اے ایں تے ایوان اچ ڳالھ تھیوݨی چاہیدی اے ، پاکستان تے پڑوسی ملکاں اچ جیڑھا ضیان تھئے ایندی ماضی اچ مثال نی ملدی ۔ محکمہ موسمیات 30 ، 40 فیصد توں ودھ مینھ دی پیشنگوئی کیتی ہئی ،نوشہرہ فیروز اچ 1780 ملی میٹر مینھ وٹھے ، اڄوکے سیلاب پاکستان دی معیشت، بنیادی ڈھانچہ کوں تہس نہس کرݙتے ۔ ماحولیاتی تبدیلیاں توں پاکستان کوں تھیوݨ آلے ضیان کوں ہݨ عالمی برادری وی منیندی پئی اے ،اڄ وی سندھ تے بلوچستان اچ 6 توں 8 فٹ پاݨی کھڑے۔ ٻئے ملکاں دی وجہ توں موسمیاتی تبدیلیاں پاکستان کوں متاثر کریندیاں پئن ۔ انہاں آکھیے جو سندھ اچ 80 فیصد فصلاں تباہ تھی ڳئن ، ضلع خیرپور اچ پنڈوں دے درختاں دی تباہی توں ارباں روپے دا ضیان تھئے ۔ جے پاݨی نہ کڈھیا ڳیا تاں پنڈوں دے 1.5 کروڑ درخت تباہ تھی ویسن ۔ جے ھک سال دے اندر اساں بنیادی ڈھانچہ تیار نی کیتا تاں ضیان مزید ودھ ویسی۔ انہاں آکھیے سروے دی ضرورت کائنی کیوں جو سیلابی پاݨی سارا کجھ واضح کرݙتے انہاں آکھیے سیاست ڳالھیں مندے دی نی بلکہ عوام دے مسئلے تے ݙکھاں دے حل تے مداوے دا ناں اے ۔