عالمی منڈی اچ تیل تے ڈالر دی قدر گھٹ تھیوݨ پاروں آندے مہینے عوام کوں وݙا ریلیف ملسی ، سیلاب زدگان کوں ریلیف ݙیوݨ کیتے ہݨ تئیں 65 ارب روپے دی سبسڈی ݙتی ڳئی اے. وفاقی وزیر بجلی انجینئر خرم دستگیر خان

اسلام آباد۔7اکتوبر(اے پی پی):وفاقی وزیر بجلی انجینئر خرم دستگیر خان آکھیے جو عالمی منڈی اچ تیل تے ڈالر دی قدر گھٹ تھیوݨ پاروں آندے مہینے توں فیول پرائس ایڈجسٹمنٹ دی مد اچ عوام کوں وݙا ریلیف ملسی ، حکومت ہݨ تئیں 300 یونٹ توں گھٹ بجلی استعمال کرݨ آلے صارفین، کساناں تے سیلاب زدگان کوں بجلی دے ٻلاں دی مد اچ 65 ارب روپے دا ریلیف ݙتے ۔ قومی اسمبلی اچ ڳالھ کریندے ہوئیں وفاقی وزیر آکھیے جو پچھلے مہینے اچ فیول پرائس ایڈجسٹمنٹ دی وجہ توں عوام کوں تکلیف تھئی ، جون اچ فیول پرائس ایڈجسٹمنٹ اگست اچ بجلی دے بلاں اچ رلی جیڑھی جو 10 روپے ہئی، ہݨ تیل دیاں قیمتاں گھٹ تھی ڳئن ، ڈالر دی قدر وی گھٹ ڳئی اے ایں کیتے آندے مہینے توں بجلی دی فیول پرائس ایڈجسٹمنٹ دی مد اچ قیمت گھٹ تھی تے ݙاہ پیسے تھی ڳئی اے ، ایں توں اڳلے مہینے دے ٻلاں اچ واضح ریلیف ملسی ۔ انہاں آکھیے جو وزیراعظم شہباز شریف دی ہدایت تے عوام کوں مالیاتی ریلیف ݙتا ڳئے ایں مہینے بجلی دے ٻلاں اچ وی کمی آئی اے تاں جو اڳلے مہینے توں عوام کوں واضح ریلیف مل ویسی ۔ وزیراعظم دی ہدایت تے 200 توں 300 یونٹ تئیں بجلی استعمال کرݨ آلے صارفین، کساناں تے سیلاب زدگان کوں ریلیف ݙیوݨ کیتے ہݨ تئیں 65 ارب روپے دی سبسڈی ݙتی ڳئی اے ۔