پاکستان کیتے عالمی اعزاز، وزیراعظم شہباز شریف کوں سی او پی۔27 دی نائب صدارت ݙیوݨ دا اعلان

اسلام آباد۔10اکتوبر(اے پی پی) وزیراعظم شہباز شریف کوں ماحولیاتی تبدیلیاں دا معاملہ موثر طریقے نال اجاگر کرݨ تے اقوام متحدہ دی ماحولیاتی تبدیلیاں تے مسئلیں دے حل متعلق تنظیم (سی او پی۔27) دی نائب صدارت ݙیوݨ دا اعلان کیتا ڳئے ، اقوام متحدہ دے 195 ملکاں اچوں پاکستان دے وزیراعظم کوں ایں منصب کیتے منتخب کیتا ونڄݨ ٻہوں وݙا عالمی اعزاز اے ۔ وزیراعظم آفس دے میڈیا ونگ توں جاری بیان موجب وزیراعظم شہباز شریف کانفرنس آف پارٹیز (سی۔او۔پی۔27) دے اجلاس دی ناروے دے وزیراعظم ، مصر دے صدر دے رلے مشترکہ صدارت کریسن ۔ اے اجلاس شرم الشیخ، مصر اچ 6 توں 18 نومبر کوں تھیسی ۔ واضح رہے جو ایں ویلھے ’’سی۔او۔پی۔27‘‘ دی صدارت مصر کنے ہے ۔ مصر دے صدر عبدالفتاح السیسی وزیراعظم شہباز شریف کوں “سی۔او۔پی۔27” اجلاس دی مشترکہ صدارت دی دعوت ݙتی اے۔ اجلاس اچ عالمی سربراہان، حکومتاں دے سربراہ، عالمی مالیاتی اداریں تے تھنک ٹینکس دے ذمہ وار شرکت کریسن ۔ اقوام متحدہ دے اہتمام نال ماحولیاتی تبدیلیاں دے مسئلیں تے انہاں دے حل دے حوالے نال اے 27 واں اجلاس ہوسی۔ وزیراعظم شہباز شریف دی ماحولیاتی تبدیلیاں دے حوالے نال پراثر آواز تے انہاں کوں اے منصب ݙتا ڳے۔اڄوکے سیلاب دے بعد وزیراعظم شہباز شریف شنگھائی تعاون تنظیم (ایس۔سی۔او) دے سربراہان مملکت و حکومت دی کونسل اتے اقوام متحدہ دی جنرل اسمبلی دے 77 ویں اجلاس اچ ماحولیاتی تبدیلیاں تے موثر آواز چاتی ہئی۔ ماحولیاتی تبدیلیاں دے مسئلے کوں ’’ایس۔سی۔او‘‘تنظیم دی سطح تے چاوݨ دی وزیراعظم شہباز شریف دی تجویز دی ٻئے ملکاں تائید کیتی ہئی ۔ شنگھائی تعاون تنظیم دے سربراہان مملکت اتے حکومت دی کونسل دا اجلاس 15 توں 16 ستمبر کوں سمر قند اچ تھیا ہئی ۔