تھرکول منصوبہ علاقے دی ترقی اتےخوشحالی دا منصوبہ اے، کوئلے نال بجلی ٻݨاوݨ سارے پاور پلانٹس کوں تھر دے کوئلے تے منتقل کرݨ ہوسی، وزیراعظم شہبازشریف

تھر۔10اکتوبر (اے پی پی) وزیراعظم محمدشہبازشریف تھرکول کوں معاشی ترقی کیتے گیم چینجز قرار ݙیندیں ہوئیں آکھیا جو تھرکول منصوبہ علاقے دی ترقی اتےخوشحالی دا منصوبہ اے، کوئلے نال بجلی ٻݨاوݨ سارے پاور پلانٹس کوں تھر دے کوئلے تے منتقل کرݨ ہوسی۔ سی پیک دے تحت توانائی دے شعبے اچ سرمایہ کاری چین دا وݙا تحفہ اے، ریلوے لنک نال تھر دے دے کوئلے دی ملک اچ ترسیل سوکھی ہوسی۔ اے ڳالھیں انہاں سنوار کوں اتھاں تھر انرجی بلاک ٹو اتے تھر کول مائنز ٹو دی افتتاحی تقریب توں خطاب کریندیں ہوئیں آکھی۔ ایں موقع تے وزیر خارجہ بلاول بھٹو زرداری، سابق وزیراعظم شاہد خاقان عباسی ،وفاقی وزیر منصوبہ بندی احسن اقبال ، وفاقی وزیر بجلی خرم دستگیر خان ، وزیر مملکت برائے پٹرولیم مصدق ملک ، وزیراعلیٰ سندھ سید مرادعلی شاہ ، پاکستان اچ چین دے سفیر نونگ رونگ اتے ٻئی اہم شخصیات موجود ہن۔ وزیراعظم آکھیا جو مشکلات دے باوجود منصوبے دی تکمیل تے چیئرمین حبکو اتے انہاں دی ٹیم سمیت ساریاں کوں مبارخ ݙینداں۔ 1996 اچ سابق وزیراعطم شہید بےنظیر بھٹو جݙاں ایں علاقے دے دورے تے آئی تاں اتھاں صحرا ہئی پر تھر ہݨ تکھے ترقی کریندا پئے۔ اے منصوبہ علاقے دی ترقی دا منصوبہ اے۔ دنیا اچ کوئلے دا نرخ 67 ڈالر فی ٹن توں ڳھٹ تے 44 ڈالر تے آڳے اتے اے ٻیا ڳھٹ تے 30 ڈالر تئیں آوݨ دا امکان اے۔ تھر دے کوئلے نال ایں ویلھے بݨݨ آلی بجلی دا جیڑھا نرخ اے او ڳھٹ تے 10 روپے فی یونٹ تھی ویسی۔ تھرکول جدید ٹیکنالوجی دا منصوبہ اے۔ وزیراعظم آکھیا جو تھر اچ 175 ملین ٹن کوئلے دے ذخائر موجود ہن اتے ہک لکھ میگاواٹ بجلی اگر اساں ٻݨاؤں تاں اے ترائے سو سال دا خزانہ اے۔ توانائی دے لوڑھ کوں پورا رکݨ کیتے چووی ارب ڈالر خرچیے ڳئن۔ کوئلے توں فائدہ چا تے ملکی صنعتاں ترقی کریسن۔ سستی مصنوعات ٻݨسن۔ تریمتیں ٹرک ڈرائیور نال وی ملاقات تھئی اے۔ تھر اچ حکومت دے اقدامات نال ہزاراں لوکاں کیتے روزگار دے موقع میسر آئن۔ آندے ہفتے اسلام آباد اچ ہک اجلاس دی صدارت کریساں جئیں اچ سارے متعلقہ فریقین کوں شرکت دی دعوت ݙتی ویسی اتے توانائی دے شعبے بارے اقدامات دا جائزہ ڳھدا ویسی۔ ایں موقع تے وزیر خارجہ بلاول بھٹو زرداری خطاب کریندیں ہوئیں آکھیا جو تھرکول منصوبہ شروع تھیوݨ نال تھر دی عوام کوں روزگار ملیے۔ دسمبر اچ ہک ٻئے منصوبے دا منݙھ بدھیا ویسی، کہیں وی وی گمان کائنا ہئی جو تھرپارکر دے ریگستان توں کوئلہ ملسی۔ اساکوں ترقی دا ہک نواں سلسلہ شروع کرݨا پوسی۔ صوبے اچ تاریخ دا ٻہوں وݙا چھل آئے۔ ݙینھ رات محنت کروں تاں ہک سال اچ گرین انرجی اچ انقلاب آسڳدے۔ پاکستان اچ چین دے سفیر نونگ رونگ آکھیا جو منصوبے تے کم کرݨ آلیاں کوں بہترین سکیورٹی ݙیوݨ تے پاک فوج دا شکریہ ادا کریندوں۔ تھر بلاک ون اتے ٹو نال پاکستان کوں زرمبادلہ دی بچت تھیسی۔ بجلی دی پیداوارودھسی۔ ملازمتاں دے موقع ودھسن۔ سی پیک خطے دی خوشحالی دا شاندار منصوبہ اے۔ سی پیک نال پاکستان اچ 85 ہزار ملازمتاں دے موقع پیدا تھین۔ چین چھل متاثرین دی مدد کیتے وی نوے ملین ڈلار پاکستان کوں ݙیوݨ دا اعلان یتے۔ ڈیزاسٹرمینجمنٹ دے ماہرین دی ٹیم پاکستان امدی پئی اے۔