اسلام آباد۔20اکتوبر(اے پی پی) اسلامی تعاون تنظیم (او آئی سی) دے وزرا اطلاعات کانفرنس دا 12 واں اجلاس 21 تے 22 اکتوبر کوں ترکی دے شہر استنبول اچ تھیسی ۔ وفاقی وزیر اطلاعات مریم اورنگزیب کانفرنس اچ پاکستان دی نمائندگی کریسن ۔ ݙو ݙینھ کانفرنس دا موضوع ”سچ دے دور دے بعد غلط معلومات اتے اسلاموفوبیا توں نبݨݨا “ اے۔ کانفرنس دے افتتاحی سیشن توں او آئی سی دے سیکرٹری جنرل حسن ابراہیم طحٰہ خطاب کریسن ۔ کانفرنس اچ اطلاعات دے مختلف شعبیں اچ او آئی سی دے کردار تے توجہ مرکوز کیتی ویسی ۔ او آئی سی دی وزرااطلاعات کانفرنس اچ خاص طور تے فلسطین اتے القدس شریف دے مسئلیں دے حوالے نال میڈیا کوں متحرک کرݨ سودھے افریقی او آئی سی رکن ملکان دے مسئلیں کوں اجاگر کیتا ویسی ۔ او آئی سی وزرا اطلاعات کانفرنس اچ اسلامو فوبیا نال نبݨݨ اچ او آئی سی دے کردار، اسلام دی سدھی تصویر پیش کرݨ تے میڈیا دے حلقیں اچ انتہاءپسندی و دہشت گردی توں بچݨ دے حوالے نال امور تے غور کیتا ویسی ۔ کانفرنس اچ مسلم دنیا اچ میڈیا دی مہارت تے تربیت دے ودھارے دے حوالے نال امور تے ڳالھ مہاڑ تھیسی ۔
