اسلام آباد۔20اکتوبر(اے پی پی):وزیراعظم محمد شہبازشریف خیبر پختونخوا تے پنجاب دی حکومتاں توں اپیل کیتی اے جو او اعلیٰ معیار دے بج دی ونڈ دے وفاقی حکومت دے پروگرام اچ رلن تے اینکوں سیاسی مسئلہ نہ بݨاون ، پاکستان ساݙا سانجھا اے،ذاتی و سیاسی پسند اتے ناپسند تے مفادات توں ھک پاسے تھی تے سیلاب متاثرین دی مدد کیتے کم کیتا ونڄے ۔ وفاقی حکومت نجی شعبے کوں ہرگز کݨک درآمد کرݨ دی اجازت نہ ݙیسی ۔ ایں اوکھی صورت حال اچ کہیں کوں ناجائز منافع خوری کرݨ تے عوام تے ٻوجھ پاوݨ نہ ݙیسوں ۔ وزیراعظم خمیس کوں اتھاں آپݨی صدارت اچ نیشنل فلڈ ریسپانس اینڈ کوآرڈینیشن سینٹراچ جائزہ اجلاس توں خطاب کریندے پئے ہن ۔ ایں موقع تے وفاقی وزرا احسن اقبال، طارق بشیر چیمہ، ایاز صادق ، شیری رحمن، خرم دستگیر دےعلاوہ این ڈی ایم اے، این ایف آر سی سی اتے اعلیٰ صوبائی حکام وی موجود ہن ۔ وزیراعظم آکھیے جو سیلاب متاثرین دی مدد ،بحالی تے آبادکاری دے کم اچ اساکوں سیاست توں مکمل پرہیز کرݨا چاہیدے ۔ وفاقی حکومت متاثرین دی بحالی تے ریلیف کیتے بھرپور طریقےنال کم کیتے ۔ ہݨ تئیں 66 ارب روپے متاثرین اچ ݙتے ڳئن ۔ ھک لکھ 10 ہزار خانداناں کوں اے رقم وختی منتقل تھی ویسی ۔ وفاقی حکومت چارے صوبیں تے گلگت بلستان اتے آزاد کشمیر اچ سارے متاثرین کیتے اقدامات کیتن تے جاں بحق تھیوݨ آلیں دے خانداناں کوں 10 لکھ روپے فی کس دا پیکج ݙتے ۔ سیلاب توں 1700 توں ودھ لوک جاں بحق تھئن ۔ این ڈی ایم اے شفاف طریقے نال اے رقم ونڈی اے۔ وفاقی حکومت دی طرفوں ہݨ تئیں ایندے حصے دے مطابق 88 کروڑ روپے ݙتے ڳئن ۔ زخمیاں کیتے جیڑھا پیکیج ݙتا ڳیا ہئی ایندی ونڈ تھیندی پئی اے ۔
