سیاسی میدان خونی میدان نی ٻݨݨے چاہیدے، عمران خان دے لانگ مارچ اچ فائرنگ دا واقعہ افسوسناک اے، وزیر اطلاعات مریم اورنگزیب

اسلام آباد۔3نومبر  (اے پی پی) وفاقی وزیر اطلاعات تے نشریات مریم اورنگزیب عمران خان دے لانگ مارچ اچ فائرنگ دے واقعہ دی مذمت کریندیں ہوئیں آکھیا جو سیاسی میدان خونی میدان نی ٻݨݨے چاہیدے، عمران خان دے لانگ مارچ اچ فائرنگ دا واقعہ افسوسناک اے۔ خمیس کوں آپݨے بیان اچ انہاں آکھیا جو واقعے کوں سیاسی رنگ ݙیوݨ دی کوشش نہ کیتی ونڄے، پنجاب پولیس، پنجاب دی انتظامیہ، پنجاب دے انٹیلی جنس ادارے واقعہ دی تحقیقات کرتے حقائق عوام دے سامھے ڳھن  آون۔ انہاں آکھیا جو سینیٹ دی قائمہ کمیٹی برائے اطلاعات دے چیئرمین سینیٹر فیصل جاوید دی فوٹیج ݙٹھی اے او زخمی ہن انہاں دی صحت یابی کیتے دعا کریندوں۔ انہاں آکھیا جو وزیراعظم واقعہ دی ابتدائی رپورٹ منڳ ڳھدی اے۔ انہاں آکھیا جو اے واقعہ پنجاب حکومت دی حدود اچ تھیے، ایں واقعے تے قیاس آرائیاں نی تھیوݨی چاہیدی، اے حساس معاملہ اے۔ میڈیا کوں ذمہ واری ݙکھاوݨی چاہیدی اے۔ انہاں آکھیا جو وزیر داخلہ رانا ثناء اللہ پنجاب حکومت، آئی جی پولیس اتے چیف سیکریٹری پنجاب نال رابطے اچ ہن، جینویں کوئی مصدقہ اطلاع ملدی اے او میڈیا نال شیئر کیتی ویسی۔