اقوام متحدہ دے تحت عالمی موسمیاتی رسک انڈیکس ٻݨیڄے، ھیݨے ملکاں کیتے شفاف موسمیاتی فنانس دا نواں، وادھو اتے پائیدار وسائل دا نظام اپناوݨا چاہیدے، وزیراعظم شہباز شریف

شرم الشیخ۔8نومبر(اے پی پی)وزیراعظم محمد شہباز شریف ترقی پذیر اتے کمزور ممالک دی لوڑھ سانڳے شفاف طریقہ کار دے تحت موسمیاتی فنانس دے نویں، اضافی اتے پائیدار وسائل دی لوڑھ تے زور ݙیندے آکھیے جو موسمیاتی تباہی دی فرنٹ لائن تے موجود ملکاں اتے لوکاں کیتے موجودہ مالیاتی فرق وݙا اے، اقوام متحدہ دے نظام دے تحت ہک عالمی موسمیاتی رسک انڈیکس ٻݨای ونڄے نان اساں بہوں پچھو رہ ویسوں، پیرس معاہدے اچ ݙتے طریقہ کار توں وی ودھ ذمہ داریاں دا احترام ہووݨا چاہیدے۔ اے ڳالھ انہاں یو این کلائمیٹ چینج کانفرنس کاپ 27 دے سربراہ اجلاس نال خطاب اچ آکھی۔ انہاں کاپ 27 کانفرنس دی میزبانی تے مصر دے صدر عبدالفتح السیسی کوں مبارک ݙتی جو ایندے نال نسل انسانی دی بقا سانڳے اقدامات اچ مدد ملدی پئی اے، کمزور اتے ݙھیلے ملک اپݨے مسائل، وسائل آلے ملکاں دے اڳو رکھ تے مسلیاں دے حل دی راہ کݙھ سڳدن، انصاف دے مشترکہ مقاصد اتے ضروری پالیسیاں دی بحالی کیتے جامع روڈ میپ اپنایا ونڄے جیڑھا ساݙی صلاحیت توں ودھ تیزی نال بحالی اچ مدد ݙیوے۔ انہاں سیلاب دے نقصانات دا  ݙسیندے اکھیے جو ودھ چیلنج دے باوجود لوکاں کوں اپݨے پیرین تے کھڑا کرݨ اچ ردھے ہوئے ہیں، سیلاب پاروں تھیوݨ آلا 30 ارب ڈالر دا نقصان وݙا نقصان اے جیکوں بھرݨ کیتے ڄڳ کوں وی ہتھ ونݙاوݨا چاہیدے، پاکستان کاربن گیساں دے اخراج اچ نا ہووم دے برابر حصہ دے نقصان وݙا اے، فنانسنگ اتے ٹائم لائن ہر لحاظ نال موافقت دے عالمی ہدف کوں ترجیح ݙیوݨی ہوسی، نقصانات کوں پورا کرݨ دا معاملہ کاپ 27 دے بنیادی ایجنڈے دا حصہ ٻݨاوݨا ہوسی جو قرض پاروں عوامی مالی امداد دے بحران اچ پھسیے ہوئے لوکاں کوں موسمیاتی آفات کیتے فنڈز ݙیوݨے پوندن۔