اسلام آباد۔11جنوری(اے پی پی) پاکستان اچ سعودی عرب دے سفیر نواف سعید المالکی آکھیے جو پاکستان تے سعودی عرب وچال آندے ݙینھاں اچ سعودی ڈویلپمنٹ فنڈ دے ذریعے ھک ارب ڈالر توں ودھ دے معاہدے تے دستخط تھیسن ۔ اے ڳالھ انہاں سعودی ٹی وی چینل ”الاخباریہ“نال ڳالھ مہاڑ کریندے ہوئیں آکھی اے ۔ نواف سعید المالکی آکھیے جو پاکستان 1947ءاچ جݙاں وجود اچ آیا تاں سعودی عرب انہاں پہلے ملکاں اچ شامل ہئی جیں پاکستان کوں منیا تے مدد کیتی ۔ انہاں آکھیے سعودی عرب دے بانی توں گھن تے خادم الحرمین الشریفین سلمان بن عبدالعزیز اتے ولی عہد محمد بن سلمان تئیں سعودی حکومت ہمیشہ پاکستان دا ساتھ ݙتا تے اقتصادی و مالی مدد کیتی۔ انہاں آکھیے سعودی عرب تے پاکستان دے تعلقات مثالی اتے گھاٹے ہن تے سارے شعبیں اچ ودھدے تعلقات ہم، ہݨے ہی سعودی عرب دی طرفوں پاکستان اچ سرمایہ کاری 10 ارب ڈالر تئیں ودھاوݨ دا جائزہ گھنݨ دا اعلان کیتا ڳئے ۔ ایں توں اںڄ سعودی ڈیپازٹ کوں وی ودھاوݨ دا جائزہ گھنݨ دی ہدایت کیتی ڳئی اے ۔ انہاں آکھیے آندے ݙینھاں اچ سعودی ڈویلپمنٹ فنڈ دے ذریعے پاکستان اتے سعودی عرب وچال تیل دے شعبے اچ ھک ارب ڈالر توں ودھ دے معاہدے تے دستخط تھیسن۔ انہاں آکھیے اے اقدامات سعودی عرب اتے پاکستان وچال تکڑے تذویراتی شراکت داری دی عکاسی کریندن ۔ایندے توں پہلے سعودی پریس ایجنسی دی رپورٹ موجب سعودی عرب دے ولی عہد اتے وزیراعظم شہزادہ محمد بن سلمان پاکستان اچ سعودی عرب دی سرمایہ کاری 10 ارب ڈالر تئیں ودھاوݨ دا جائزہ گھنݨ دی ہدایت کیتی ۔ شہزادہ محمد بن سلمان اسٹیٹ بینک آف پاکستان اچ سعودی عرب دی طرفوں بطور ڈیپازٹ رکھی ڳئی رقم کوں وی 5 ارب ڈالر تئیں ودھاوݨ تے غور کرݨ دی ہدایت کیتی اے ۔ سعودی فرمانروا شاہ سلمان بن عبدالعزیز گزریل سال 25 اگست کوں پاکستان اچ ھک ارب ڈالر دی سرمایہ کاری دا حکم ݙتا ہئی ۔ شہزادہ محمد سلمان ایں سرمایہ کاری اچ ودھارے کیتے جائزے دی ہدایت کیتی اے ۔ گزریل سال 2 دسمبر کوں سعودی عرب پاکستان دے مرکزی بینک اچ رکھیے ڳئے 3 ارب ڈالر دی مدت اچ مزید ھک سال ودھا ݙتا ہئی ۔ سٹیٹ بینک آف پاکستان نومبر 2021 اچ سعودی ڈویلپمنٹ فنڈ دے نال ھک معاہدے تے دستخط کیتے ہن جیں دے تحت سعودی فنڈ 3 ارب ڈالر سٹیٹ بینک اچ رکھیے ہن ۔ سعودی خبر رساں ادارے موجب سرمایہ کاری ودھاوݨ متعلق جائزے دا اے اعلان ولی عہد شہزادہ محمد بن سلمان اتے وزیر اعظم شہباز شریف دے درمیان رابطیں دے تناظر اچ کیتا ڳئے ۔
