اسلام آباد۔7مارچ(اے پی پی) وزیردفاع خواجہ محمد آصف آکھیے توشہ خانہ کیس عمران خان دے ڳل دی ہݙی بݨ چکیے ،لک تے تڑیاں ݙیوݨ اہمیت نی رکھیندا ، آخر کارعمران خان گرفتار تھیوݨا ہی ہے ، ویلھا ݙسیسی جو کون کیں دے نال کیا کریسی ، عمران خان جیل ونڄݨ توں ݙردے تاں ول تھوڑی جی ہمت محمد نوازشریف توں گھن سڳدے ۔ او پی ٹی وی ہیڈکوارٹرز اچ پریس کانفرنس توں خطاب کریندے پئے ہن ۔ وزیر دفاع آکھیے جو بلوچستان اچ دہشت گردی دے واقعہ دی مذمت کریندوں ۔ کجھ مہینے دہشت گردی دی لہرالارمنگ اے۔ سکیورٹی فورسز دہشت گردی دامقابلہ کریندی پئی اے ۔ پاک فوج ، پولیس ، ایف سی قربانیاں ݙیندے پئن ۔ انہاں آکھیے 2 ہفتے پہلے اساں افغانستان ڳئے ،ساݙا دورہ چنڳاں رہیا ۔ افغانستان دے وفد دی وی پاکستان آمد متوقع اے۔ افغانستان دی سرزمین پاکستان دے خلاف استعمال نی تھیوݨی چاہیدی ، ایں حوالے نال معاہدہ وی موجود اے۔ افغان حکومت ساݙے موقف تے مکمل عمل درآمد دی یقین دہانی کرائی اے۔ انہاں آکھیے ماضی اچ وی اساں دہشت گرداں تے قابو پاتا، ایں واری وی اساں دہشت گرداں تے قابو پیسوں ۔ انہاں آکھیے عمران خان پچھلے کجھ ݙینھ توں ڈرامہ شروع کیتا ہویا اے ۔ 75 سال اچ کئی ملزم عدالتاں اچ پیش تھئے ۔ سیاسی رہنما قربانیاں ݙیندے آئن ، ساݙی تاریخ اچ ساریں توں وݙی قربانی ذوالفقار علی بھٹو دا سولی تے چڑھ ونڄݨ اے ساریں ایں ڳالھ کوں منیے ۔
