اسلام آباد۔13مارچ(اے پی پی) وفاقی وزیر قانون و انصاف سینیٹر اعظم نذیر تارڑ آکھیے اداریں کوں غیر جانبدارانہ اتے آئین وقانون دے مطابق اپݨا کم کرݨاچاہیدے، سیاسی قائدین کوں ایندا ادراک ہووݨا چاہیدے جو پولرائزیشن ملک کیتے نقصان دہ ہے ۔اے ڳالھ انہاں سنوار کوں نیشنل ویمن پولیس کانفرنس دے افتتاحی سیشن دے بعد میڈیا نال ڳالھ مہاڑ کریندے ہوئیں آکھی اے ۔ وفاقی وزیرآکھیے جو حکومت عمران خان دی گرفتاری متعلق آئین اتے قانون تےعمل پیرا اے۔ اسلام آباد پولیس عمران خان دے وارنٹ گرفتاری دے معاملے تے قانون تے عمل کیتے تے طاقت استعمال نی کیتی ۔ عمران خان دا رویہ غیر ذمہ دارانہ اے۔ عمران خان اڄ وی عدالت اچ حاضری توں استثنا دی درخواست دائر کیتی اے ۔ انہاں آکھیے عمران خان ماضی اچ تے ہݨ وی ساریں کیتے ھکو سویں انصاف دامطالبہ کریندن لیکن ایں کیتے انہاں کوں خود وی عملی ثبوت ݙیوݨا چاہیدے ۔ اوزمان پارک اچ ٻہہ تے قوم دے ٻالاں کوں ڈنڈے سوٹے کھواوݨ دی بجائے خود سامݨے آون ۔ انہاں آکھیے وزیراعظم شہباز شریف کوں اے کریڈٹ ویندے جو انہاں توشہ خانہ داریکارڈ پبلک کرݨ دا فیصلہ کیتے ۔ اے معاملہ عدالت اچ ہئی لیکن موجودہ حکومت اپیل اچ ونڄݨ دی بجائے توشہ خانہ داریکارڈ عوام دے سامݨے پیش کیتا۔ وزیراعظم شہبازشریف دی ہدایت تے خواجہ آصف دی سربراہی اچ ایں حوالے نال کمیٹی بݨائی ڳئی ہئی جیں اچ ساری سیاسی جماعتاں دی نمائندگی شامل ہئی۔ وزیرقانون آکھیے وزیراعظم پہلے پنجاب دے وزیراعلیٰ دی حیثیت نال تے ہݨ وزیراعظم دے عہدے تے ہوندے ہوئیں ٻاہرلے ملک توں ملݨ آلے تحائف توشہ خانہ اچ جمع کرائے۔
