متنازع بنچ دا فیصلہ ناقابل قبول، چیف جسٹس مستعفی تھیون، وزیر اطلاعات و نشریات دی پریس کانفرنس

اسلام آباد۔7اپریل(اے پی پی) فاقی حکومت جسٹس اطہر من اللہ دے اختلافی نوٹ کوں عدالتی کارروائی تے سوالیہ نشان قرار ݙیندے مطالبہ کیتے جو مسترد شدہ درخواست تے صرف ہکے لاڈلے کوں سہولت کاری ݙیوݨ آلا ہک متنازعہ بنچ دا فیصلہ کیویں منیڄ سڳیندے، چیف جسٹس کوں متنازع تھیوݨ تے استعفے ݙیوݨا چاہیدے۔ اسلام آباد اچ پریس کانفرنس کریندے وفاقی وزیر اطلاعات و نشریات مریم اورنگزیب آکھیے جو جستس اطہر من اللہ دا اختلافی نوت وݙا اہم اے، چیف جسٹس ہک ڈس مس کیتی ڳئی درخواست تے کیویں بنچ ٻݨا سڳدن؟ اے الیکشن دا نئیں بینچ فکسنگ دا معاملہ اے جو عدالت الیکشن کمیشن دے معاملات اچ دخل اندازی کیتی اے، ڄݙاں پوری عدالتی کارروائی ہی متنازع تھی ونڄے تاں ایکوں عوام کیویں منیسن، اطہر من اللہ وی منیے جو بحران دی شروعات ہی از خود نوٹس توں تھئی اے۔ مریم اورنگزیب آکھیے جو ہک لاڈلے دی سہولت کاری قابل قبول نئیں، ٻیاں 13 سیاسی جماعتاں کوں تاں نئیں سݨیا ڳیا، کیا الیکشن صرف پی ٹی آئی لرݨا ہئی؟ آئین دی اپݨی مرضی دی تشریح منی ونڄ سڳدی اے ناں اینڄھے بنچ دا فیصلہ منیسوں، اڄ عمران داری تے آئین و سچ دی فتح تھئی اے، سچ ٻولݨ آلے ججاں ایں سہولت کاری کوں بے نقاب کیتے۔ انہاں آکھیے جو جسٹس اطہر من اللہ دا فیصلہ آوݨ دے بعد اکثریت ججز دا فیصلہ مکمل تھی ڳئے جو صرف پارلیمان ہی نئیں سپریم کورٹ دے چار جج وی فل کورٹ دی صلاح ݙتی ہئی۔ وفاقی وزیراطلاعات آکھیا جو چیف جسٹس آف پاکستان دی اپݨی پوزیشن متنازع تھی ڳئی اتے او ایندے تے استعفیٰ ݙیون، اے سازش اتے آئین نال کھلوار دی اجازت نئیں ݙتی ونڄ سڳدی، الیکشن پورے ملک اچ ہکے ویلھے تھیوݨے چاہیدن۔