آئین دے پنجاہ سال مکمل تھیوݨ تے ڈی چوک تے’’ یادگار دستور‘‘ دا سنگ بنیاد رکھ ݙتا ڳئے

اسلام آباد۔10اپریل(اے پی پی) آئین دے پنجاہ سال مکمل تھیوݨ تے ڈی چوک تے ’’ یادگار دستور‘‘ دا سنگ بنیاد رکھ ݙتا ڳئے ۔ ایں سلسلے اچ تقریب سنوار کوں تھئی ۔ سپیکر قومی اسمبلی راجہ پرویز اشرف وفاقی وزیر اطلاعات و نشریات مریم اورنگزیب سودھے ارکان پارلیمنٹ دی وݙی تعداد دے رلے یادگار دستور دا سنگ بنیاد رکھیا۔ ایں موقع تے سپیکر قومی اسمبلی راجہ پرویز اشرف آکھیے سی ڈی اے 14 اگست 2023 توں پہلے ڈی چوک اچ یادگار دستور مکمل کریسی ۔ انہاں آکھیے 10اپریل 1973 کوں متفقہ آئین دا منظور تھیوݨ اہم قومی سنگ میل اے ۔اسلامی، وفاقی، پارلیمانی اتے جمہوری آئین دا خاکہ قائد اعظم محمد علی جناح آپݨی پہلی تقریر اچ ہی ݙے ݙتا ہئی ۔ انہاں آکھیے میں سمجھداں جو 14 اگست 1947 دے بعد 10 اپریل 1973 ساریں توں اہم ݙینھ ہئی جݙاں متفقہ آئین بݨیا۔ دنیا دے اکثر ملکاں اچ دستور دی یادگار موجود اے۔ میاں رضا ربانی تے انہاں دی پوری کمیٹی کوں مبارخ ݙینداں جنہاں یادگار دی تعمیر دا فیصلہ کیتا امید اے وختی ایں یادگار کوں مکمل کیتا ویسی ۔ یادگار دے ڈیزائن کیتے ملک گیر مقابلہ کروایا ویسی تے آئین دے شایان شان ڈیزائن دی منظوری ݙتی ویسی ۔ شاہراہ دستور تے یادگار دے نال ھک باغ وی تعمیر کیتا ویندا پئے جیں توں شہریاں کوں تفریح وی ملسی ۔امید اےیادگاردستور اچ آئین تے دستخظ کرݨ آلی تاریخی شخصیات کوں مناسب انداز اچ خراج تحسین پیش کیتا ویسی ۔ سپیکر آکھیے یادگار دے تقدس کوں برقرار رکھیا ویسی ۔ امید اے سی ڈی اے ایں تے خصوصی توجہ ݙیسی ۔ انہاں ساریاں سیاسی جماعتاں کوں مخاطب کریندے ہوئیں آکھیے جو آؤ اساں سارے اختلافات توں بالاتر تھی تے آپݨے محسناں دا شکریہ ادا کروں۔ بعد اچ سپیکر قومی اسمبلی پارلیمنٹ دے سبزہ زار اچ واقع یادگار شہدا تے حاضری ݙتی پھل پیش کیتے اوں توں بعد ڈی چوک اچ یادگار دے افتتاح دے طور تے باغ داپہلا ٻوٹا وی لاتا ایں موقع تے ملکی ترقی ، خوشحالی ، آئین دی سربلندی اتے جمہوریت دے استحکام کیتے خصوصی دعا کیتی ڳئی ۔سپیکر پارلیمنٹ ہائوس اچ 1973 دے آئین دی منظوری متعلقہ تاریخی تصویراں تے مبنی’’تصویری نمائش ‘‘ دا افتتاح کیتا۔