اسلام آباد۔8مئی(اے پی پی) صدر مملکت ڈاکٹر عارف علوی آکھیے ملک اچ سیاسی استحکام اتے شہریاں دے بنیادی حقوق کوں یقینی بݨاوݨ کیتے آئین دی پاسداری معاشرے دے سارے طبقات دی ذمہ واری اے، انتظامی اتھارٹی توں علاوہ ریاست اتے ایندے اداریں دا فرض اے جو او فلاح و بہبود تے مبنی نظام دے ذریعے معاشرے اچ بہتری گھن آون ۔ اے ڳالھ انہاں ایوان صدر اچ سماجی بہبود کیتے عوامی خدمات دے اعتراف دے حوالے نال منعقدہ تقریب توں خطاب کریندے ہوئیں آکھی اے۔ نیٹ ورک فار ہیومن اینڈ سوشل ڈیولپمنٹ دے زیر اہتمام ایں تقریب اچ انسانی خدمت اتے انسان دوستی دے شعبے اچ محکمیں تے لوکاں دی خدمات دا اعتراف کیتا ڳے۔ صدر عارف علوی آھیے آئین شہریاں کوں اختیار ݙتے جیں توں سماجی انصاف تے مبنی سیاسی نظام دی حامل فلاحی ریاست دا ادراک تھئے ۔ انہاں آکھیے آئین دی بالادستی ٻہوں ضروری اے کیوں جو ایندے ستون تعلیم، صحت، روزگار، اتے سماجی اتے معاشی انصاف سودھے مختلف شعبیں اچ بنیادی حقوق دے اہداف کوں متعین کریندن ۔ انہاں آکھیے آئین کہیں سیاستدان یا ادارے توں نی بلکہ ملک دے ہر فرد متعلق اے۔ صدر ودھدی ہوئی آبادی، خاص طور تے غربت، ناخواندگی اتے بے روزگاری دے مسئلیں نال نبݨݨ کیتے سماجی بہبود اتے انسان دوستی دی اہمیت تے زور ݙتا ۔
