وزیرِ اعظم شہباز شریف دا خیبر پختونخوا دے ضم تھیے ضلعیاں کیتے بجٹ اچ خصوصی ترقیاتی منصوبے شامل کرݨ دا فیصلہ

اسلام آباد۔7جون  (اے پی پی) وزیرِ اعظم  شہباز شریف دا خیبر پختونخوا دے ضم تھیے ضلعیاں کیتے بجٹ اچ خصوصی ترقیاتی منصوبے شامل کرݨ دا فیصلہ کیتے اتے ایں بارے متعلقہ حکام کوں ہدایت ݙے ݙتن۔ بدھ کوں وزیراعظم آفس دے میڈیا ونگ توں جاری بیان موجب   وزیرِ اعظم محمد شہباز شریف نال خیبر پختونخوا دے  ضم  تھیے ضلعیاں توں ارکان قومی اسمبلی بدھ کوں ملاقات کیتی۔ ملاقات کرݨ آلیاں اچ   وفاقی وزیر سمندر پار پاکستانیز ساجد حسین طوری،  ممبران قومی اسمبلی محسن داوڑ اتے محمد جمال الدین شامل ہن ۔ ملاقات اچ وزیرِ خزانہ اسحاق ڈار، وزیرِ منصوبہ بندی احسن اقبال، اتے متعلقہ اعلی حکام وی موجود ہن۔ وزیراعظم آکھیا جو خیبر پختونخوا دےضم تھیے ضلعیاں دے لوکاں دی ترقی حکومت دی پہلی ترجیح اے۔ ملاقات اچ ارکان قومی اسمبلی وزیرِ اعظم کوں بجٹ بارے صوبہ خیبر پختونخوا دے  ضم  تھیے ضلعیاں دے مسئلے اتے ترقیاتی منصوبیاں تے تجاویز ݙتی۔ وزیرِ اعظم  شہباز شریف دا خیبر پختونخوا دے ضم تھیے ضلعیاں کیتے بجٹ اچ خصوصی ترقیاتی منصوبے شامل کرݨ دی ہدایت جاری کیتی۔