پاکستان ڈیفالٹ دے خطرے توں نکل ڳئے ، جادو ٹوݨے کرݨ آلے ناکام تھی ڳئن ،ترقی کیتے کرپشن، بجلی وگیس چوری کوں روکݨا پوسی ، وزیراعظم  شہباز شریف

کراچی۔26جولائی(اے پی پی) وزیراعظم محمد شہباز شریف پاکستان ڈیفالٹ دے خطرے توں نکل ڳئے ، جادو ٹوݨے کرݨ تے پھوکے مارݨ آلے ناکام تھی ڳئن ،ترقی کیتے کرپشن، بجلی وگیس چوری کوں روکݨا پوسی، نینگراں کوں ہنر مند تے بااختیار بݨاوݨا ہوسی۔  آندے الیکشن اچ موقع ملیا تاں صوبیں نال رل تے باصلاحیت نینگراں اچ ہر سال 10 لکھ لیپ ٹاپ ونڈیسوں ۔ اے ڳالھ انہاں وزیراعظم  لیپ  ٹاپ سکیم اتے وزیرِاعظم یوتھ بزنس لون دے تحت چیک ونڈݨ دی تقریب توں خطاب کریندے ہوئیں آکھی اے ۔ ایں موقع تے وزیراطلاعات و نشریات مریم اورنگزیب، وفاقی وزیر انفارمیشن ٹیکنالوجی امین الحق، وفاقی وزیر توانائی انجینئر خرم دستگیر،  گورنر سندھ کامران ٹیسوری، وزیراعلیٰ سندھ  مراد علی شاہ، وزیراعظم دی معاون خصوصی امور نوجوانان شزہ فاطمہ اتے صوبائی وزرا  توں علاوہ طالبیں دی وݙی تعداد موجود ہئی ۔ تقریب توں خطاب اچ وزیراعظم آکھیے نینگراں اچ لیپ ٹاپ ونڈݨ تے انہاں کوں بااختیار بݨاوݨ دی تقریب اچ شرکت میں کیتے فخر دی ڳالھ اے ۔سندھ دےوزیراعلیٰ صوبے اچ لیپ ٹاپ دی ونڈ تے ترقیاتی وسائل ݙیوݨ کیتے کوشاں ہن ۔گورنر سندھ  گورنر ہائوس  اچ   نینگراں کیتے شاندار پروگرام شروع کیتے جیڑھا جو ٻہوں چنڳی ڳالھ اے ۔لیپ ٹاپ گھنݨ آلے طالبیں دی اکثریت دا تعلق صوبے دے مختلف علاقیں توں اے ۔ نینگراں کوں تعلیم ݙیوݨ کیتے جتنے وی وسائل ݙیوݨ دی لوڑھ اے کرݨے چاہیدن ۔ ایں توں ملک تکھے ترقی دے رستے ٹرسی ، اساں فری لانسنگ  کیتے پروگرام شروع کیتے ۔پاکستان دے نینگر اچ صلاحیت اے۔  قوم کوں اڳوں ودھاوݨ کیتے نینگراں کوں ہنر مند اتے بااختیار بݨاوݨا ہوسی  ۔ وزیراعلیٰ سندھ مراد علی شاہ آکھیے نینگراں کوں سہولتاں ݙیوݨ حکومت دی ذمہ واری اے ، لیپ ٹاپ سکیم ٻہوں اہم اے ، حکومت سندھ ہونہار طلبہ اتے باصلاحیت نینگراں کیتے خود کئی پروگرام شروع کیتن ، لیپ ٹاپ اتے لون گھنݨ آلیں اچ 70فیصد تریمتاں ہن ، تریمتاں دی ترقی سانڳے خصوصی اقدامات کیتے ویندے پئن ،این ای ڈی یونیورسٹی اچ25ارب روپے دی سرمایہ کاری نال ٹیکنالوجی پارک بݨایا ویسی  ۔ایں موقع تے سندھ پولیس دے چاق و چوبند ددستے طالبیں کوں گارڈ آف آنر وی پیش کیتا۔