اسلام آباد۔27ستمبر(اے پی پی):حاجیاں دی سوکھ کیتے لائیو موبائل ایپ تیار کیتی ویسی جیں دے ذریعے ساری تفصیلات دا حصول اتے ٹریکنگ ممکن ہوسی۔ اے ڳالھ نگران وزیر مذہبی امور انیق احمد وزارتِ انفارمیشن ٹیکنالوجی دے وزیر عمر سیف دے رلے منعقدہ اجلاس اچ آکھی اے ۔ وزارت دے ترجمان موجب اجلاس اچ وزارت انفارمیشن ٹیکنالوجی دی مدد نال حج آئی ٹی سسٹم اچ بہتری تے اصلاحات گھن آوݨ تے اتفاق کیتا ڳئےتاں جو حاجیاں کوں چنڳیاں توں چنڳیاں سہولتاں تے شکاریتاں دے ازالے دے نظام کوں تکھا کیتا ونڄے۔ اجلاس اچ پنجاب آئی ٹی بورڈ، نیشنل آئی ٹی بورڈ اتے وزارتِ مذہبی امور دے ایڈیشنل سیکرٹری، جوائنٹ سیکرٹری حج اتے حج آئی ٹی سیل دے نمائندے شریک تھئن۔ وزیر مذہبی امور انیق احمد آکھیے او حج آپریشن کوں مکمل ڈیجیٹلائزڈ اتے اینڈ ٹو اینڈ پیپر لیس کرݨ چاہندن ۔ سارے حاجیاں دی سوکھ کیتے ایپ تیار کیتی ویسی جیں اچ ساری تفصیلات تے ٹریکنگ ممکن ہوسی ۔ سعودی عرب اچ حاجیاں دی نقل حرکت اتے مالیاتی نظام کیتے کمپوٹرائزڈ نظام بݨیسوں ۔نجی حج گروپ دے منیجمنٹ انفارمیشن سسٹم کوں مزید فعال بݨایا ویسی ۔ وزیر انفارمیشن ٹیکنالوجی عمر سیف یقین ݙیوائے جو حاجیاں دی بہتری سانگے وزارتِ آئی ٹی اپݨا بھرپور تعاون کریسی۔
