نگراں وزیراعظم دورہ امریکہ اچ عالمی رہنماواں نال ملاقاتاں کیتیاں،  جنرل اسمبلی توں خطاب اچ مسئلہ کشمیر تے فلسطین کوں چاتے ، اسرائیل تے پاکستان دے موقف اچ کوئی تبدیلی آئی نہ ہی آسی ، نگراں وزیر خارجہ جلیل عباس جیلانی

اسلام آباد۔28ستمبر(اے پی پی):نگراں وزیر خارجہ جلیل عباس جیلانی آکھیے نگراں وزیراعظم دورہ امریکہ اچ عالمی رہنماواں نال ملاقاتاں کیتیاں،  جنرل اسمبلی توں خطاب اچ مسئلہ کشمیر تے فلسطین کوں چاتے ، اسرائیل تے پاکستان دے موقف اچ کوئی تبدیلی آئی نہ ہی آسی۔ اساں کہیں دی تقلید نی کریندے اپݨے قومی مفاد موجب فیصلے کریندوں ، توقع رکھیندوں جو افغان عبوری حکومت سرحد پار توں دہشت گرد حملے روکیسی ، سی پیک کوں رول بیک کرݨ دا سوال ہی پیدا نی تھیندا ، آندے سالاں اچ سی پیک مزید ترقی کریسی ، دنیا دے ٻہوں سارے ملک پاکستان اچ سرمایہ کاری اچ گھاٹی دلچسپی گھندے پئن ، غیرقانونی طور تے رہݨ آلے سارے ملکاں دے پناہ گزیناں کوں واپس ونڄݨا ہوسی، کینیڈا اچ سکھ رہنما دے قتل نال بھارت دنیا دے سامݨے بے نقاب تھی ڳئے ۔ اے ڳالھ انہاں خمیس کوں پریس کانفرنس توں خطاب کریندے ہوئیں آکھی اے ۔ انہاں آکھیے نگراں وزیراعظم دورہ امریکہ اچ اقوام متحدہ دی جنرل اسمبلی دے اجلاس اچ اہم خطاب کیتا، انہاں ایں موقع تے پائیدار ترقی دے اہداف دے حوالے نال اجلاس اچ وی شرکت کیتی جیں دا اہتمام سیکرٹری جنرل کیتا ہئی تے کئی ملکاں دے سربراہ شریک تھئے ، نگراں وزیراعظم وبائی مرض متعلق اہم اجلاس اچ وی شرکت کیتی انہاں گلوبل ڈویلپمنٹ انیشیٹیو دے حوالے نال منعقدہ اجلاس توں وی خطاب کیتا جیں دا اہتمام چین کیتا ہئی۔ نگراں وزیر خارجہ ݙسائے نگراں وزیراعظم مختلف ملکاں دے سربراہواں نال وی اہم ملاقاتاں کیتیاں جیں اچ ایرانی صدر رئیسی دے علاوہ ازبکستان دے صدر، چین دے نائب صدر، وزیراعظم نیدرلینڈ، سیکرٹری جنرل اقوام متحدہ اتے عالمی مالیاتی فنڈ دی منیجنگ ڈائریکٹر، بل گیٹس، ریوٹنٹو دے سی ای او وی شامل ہن، وزیراعظم وائس آف امریکہ، واشنگٹن پوسٹ، سی این این، بلومبرگ، نیوز ویک، ٹی آر ٹی ورلڈ اتے ایسوسی ایٹڈ پریس سودھے عالمی میڈیا دے نمائندیں کوں انٹرویوز ݙتے ، انہاں پاکستانی صحافیاں تے تھنک ٹینکس دے وفد نال وی ملاقاتاں کیتیاں ، نگراں وزیراعظم یو ایس پاکستان بزنس کونسل اتے کونسل آف فارن ریلیشن دے عہدیداران نال وی ملاقاتاں کیتیاں ۔ نگراں وزیر خارجہ آکھیے دورہ نیویارک اچ میݙی وی ٻہوں زیادہ مصروفیات رہیاں، او آئی سی دے وزراء خارجہ نال کوآرڈینیشن میٹنگ تھئی جیں اچ او آئی سی دے آندے لائحہ عمل دے حوالے نال وی ڳالھ مہاڑ کیتی ڳئی ۔