پاکستان کوں معاشی ضیان توں نجات ݙیواوݨ کیتے غیر قانونی معاشی سرگرمیاں دے خلاف قانون نافذ کرݨ آلے ادارے  تے متعلقہ محکمے رل تے پوری طاقت نال کارروائیاں جاری رکھن، چیف آف آرمی سٹاف جنرل سیّد عاصم منیر

راولپنڈی۔28ستمبر(اے پی پی):چیف آف آرمی سٹاف جنرل سیّد عاصم منیرایں ڳالھ تے زور ݙتے جو پاکستان کوں مختلف طریقیں نال تھیوݨ آلے معاشی ضیان توں نجات ݙیواوݨ کیتے غیر قانونی معاشی سرگرمیاں دے خلاف قانون نافذ کرݨ آلے ادارے تے متعلقہ محکمے رل تے پوری طاقت نال کارروائیاں جاری رکھن ۔ آرمی چیف آپݨے دورہ لاہور اچ صوبائی ایپکس کمیٹی دے اجلاس اچ شرکت کیتی۔ نگران وزیر اعلیٰ پنجاب محسن رضا نقوی وی اجلاس اچ شریک تھئن ۔ پاک فوج دے شعبہ تعلقات عامہ (آئی ایس پی آر)موجب صوبائی ایپکس کمیٹی دے اجلاس اچ آرمی چیف کوں صوبے دی مجموعی سکیورٹی صورتحال، بشمول بجلی، گیس چوری، ذخیرہ اندوزی اتے غیر ملکی کرنسی دی سمگلنگ دے خلاف قانون نافذ کرݨ آلے اداریں دی کارروائیاں دے حوالے نال تفصیلی بریفنگ ݙتی ڳئی ۔ اجلاس دے شرکاء کوں اقلیتاں دے تحفظ کیتے چاتے ڳئے اقدامات اتے کچے دے علاقے اچ جاری آپریشن دی پیش رفت دا وی ݙسایا ڳئے ۔ فورم غیر قانونی طور تے رہݨ آلے غیر ملکی شہریاں دی وطن واپسی دا وی جائزہ ڳھدا ۔ آرمی چیف ایں ڳالھ تے زور ݙتے جو غیر قانونی معاشی سرگرمیاں دے خلاف قانون نافذ کرݨ آلے ادارے تے متعلقہ محکمے رل تے پوری طاقت نال کاروائیاں جاری رکھن ، غیر قانونی معاشی سرگرمیاں دے خلاف کارروائیاں دے نتیجے اچ پاکستان کوں مختلف طریقیں نال تھیوݨ آلے معاشی ضیان توں نجات مل سڳسی ۔ فورم کوں خصوصی سرمایہ کاری سہولت کونسل اتے گرین پنجاب دے اقدامات دی پیشرفت دا وی ݙسایا ڳئے ۔ آرمی چیف انہاں تاریخی اقدامات دے سود مند اثرات کیتے سارے متعلقہ محکمیں وچال ہم آہنگی دی لوڑھ تے زور ݙتا۔ شرکاء ایں ڳالھ دا اعادہ کیتے جو ریاستی ادارے، سرکاری محکمے اتے عوام صوبے دی ترقی اتے خوشحالی کیتے ھک مٹھ ہن ۔ ایندے توں پہلے آرمی چیف دی لاہور آمد تے کورکمانڈر لاہور انہاں دا استقبال کیتا۔