قومی سطح تے 35.4  بلین روپے دی لاڳت نال ہیپاٹائٹس پروگرام دا آغاز کیتا ویندا پئے ،ڈاکٹر ندیم جان

اسلام آباد۔28نومبر(اے پی پی) نگران وفاقی وزیر قومی  صحت ڈاکٹر ندیم جان آکھیے جو 35.4 بلین  روپے دی لاڳت نال قومی سطح تے ہیپاٹائٹس پروگرام دا آغاز کیتا ویندا پئے ۔ منڳل کوں وزارت صحت توں جاری بیان موجب اے ڳالھ انہاں وزارت قومی صحت اچ بین الصوبائی وزراءصحت دے اجلاس اچ کیتے ۔انہاں آکھیے نیشنل ہیلتھ سپورٹ پروگرام دا وی اجرا کیتا ویندا پئے جیں پاروں پرائمری ہیلتھ کیئر سسٹم کوں تکڑا کیتا ویسی ۔انہاں آکھیے عالمی ادارہ صحت (ڈبلیو ایچ او ) دے تعاون نال 500 بنیادی مراکز صحت دی اپ گریڈیشن اتے مکمل فعالی دا منصوبہ مختصر ترین مدت اچ مکمل کیتا ویندا پئے تے ایندا ٻوجھ قومی خزانے تے نہ پاتا ویسی ۔ اجلاس اچ صحت دے شعبے دی بہتری سانڳے مختلف موضوعات تے سیر حاصل ڳالھ مہاڑ تھئی تے اہم ترین متفقہ فیصلے کیتے ڳئن جݙاں جو اجلاس اچ سارے صوبیں دے وزرائے صحت اتے نمائندگان شرکت کیتی۔