وزیر خارجہ جلیل عباس جیلانی دی برسلز اچ پاکستان بیلجیم پارلیمانی فرینڈ شپ گروپ دی چیئرپرسن، یورپی پارلیمنٹ دے ارکان نال ملاقاتاں

برسلز۔29نومبر  (اے پی پی):نگران وزیر خارجہ جلیل عباس جیلانی بیلجیم دے دارالحکومت برسلز اچ پاکستان بیلجیم پارلیمانی فرینڈ شپ گروپ دی چیئرپرسن سینیٹر ایلیسیا کلیس اتے یورپی پارلیمنٹ دے ارکان نال ملاقات کیتی ۔بیلجیم اچ پاکستانی سفارتخانے توں جاری بیان موجب ملاقات اچ یورپی ممبران پارلیمنٹ راسا جکنیوسین، فوبیو ماسیمو کاسٹالڈو ، آنگا ھاگا، برن ہارڈ زیمنیوک، تھامس زیچووسکی ، اتے ھرو جاون شریک ہن ۔ ایں موقع تے وزیر خارجہ جلیل عباس جیلانی آکھیے جو پاکستان یورپی یونین نال ݙو پاسے کثیر الجہتی تعلقات کوں خصوصی اہمیت ݙیندے ۔ انہاں ممبران یورپی پارلیمنٹ کوں اہم علاقائی اتے عالمی امور تے پاکستان دے موقف دا ݙسائے ۔ نگران وزیر خارجہ آکھیے عالمی برادری بھارت دی طرفوں نہتے کشمیریاں تے جاری ظلم دا سلسلہ بند کراوݨ کیتے  دباؤ پاوے ۔ انہاں آکھیے بھارت دے غیر قانونی زیر تسلط جموں و کشمیر اچ جاری آزادی اظہار دی پابندیاں اتے انسانی حقوق دی سنگین خلاف ورزیاں مکاوݨ کیتے عالمی برادری اتے انسانی حقوق دی بین الاقوامی تنظیماں نال تعاون دے متقاضی ہن، پاکستان اقوام متحدہ دی سلامتی کونسل دی قرارداداں موجب نہتے کشمیریاں کوں انہاں دا جائز حق، حق خودارادیت ݙیواوݨ سانڳے آپݨی اخلاقی، سیاسی و سفارتی معاونت جاری رکھیسی ۔ وزیر خارجہ پاکستان بیلجیم پارلیمانی فرینڈ شپ گروپ دی چیئرپرسن ،سینیٹر ایلیسیا کلیس نال وی ملاقات کیتی تے معیشت، تجارت، سرمایہ کاری، تعلیم، ثقافت اتے سیاحت سودھے سانجھی دلچسپی دے مختلف شعبیں اچ ݙو پاسے تعاون ودھاوݨ تے ڳالھ مہاڑ کیتی ۔ ایں موقع تے یورپی یونین، بیلجیم تے لکسمبرگ کیتے پاکستان دی سفیر آمنہ بلوچ وی وزیر خارجہ دے رلے ہن۔