سینیٹ دی قائمہ کمیٹی برائے اطلاعات تے نشریات دا اجلاس ، اڄوکا دور ٹیکنالوجی دا اے، ریاستی میڈیا اداریاں اچ اصلاحات دی لوڑھ اے، مرتضیٰ سولنگی

اسلام آباد۔30نومبر (اے پی پی) نگران وفاقی وزیر اطلاعات، نشریات تے پارلیمانی امور مرتضیٰ سولنگی ریاستی براڈ کاسٹرز اچ اصلاحات دی لوڑھ تے زور ݙیندیں ہوئیں آکھیا جو اڄوکا دور ٹیکنالوجی دا اے، ریاستی میڈیا اداریاں اچ اصلاحات دی لوڑھ اے، اساں الیکشن آلے پاسے ویندے پئیوں، قائمہ کمیٹی برائے اطلاعات اچ سیاسی جماعتاں دی نمائندگی موجود اے، میݙی گزارش اے جو ریاستی میڈیا اچ اصلاحات دا پروگرام تے بحث کیتی ونڄے۔ اے ڳالھیں انہاں خمیس کوں سینیٹر فوزیہ ارشد دی صدارت سینیٹ دی قائمہ کمیٹی برائے اطلاعات تے نشریات دے اجلاس اچ ڳالھ مہاڑ کریندیں ہوئیں آکھی۔ اجلاس پارلیمنٹ ہاؤس دے کمیٹی روم نمبر ہک اچ تھیا۔ اجلاس اچ 9 اکتوبر 2023 کوں کمیٹی دے اجلاس اچ کیتی ڳئی سفارشات خصوصی طور 53 یومیہ اجرت تے بھرتی تھیوݨ آلے ملازماں بارے سفارشات دا جائزہ ڳھدا ڳئیا۔ قائمہ کمیٹی دے اجلاس اچ وزارت اطلاعات دے سارے محکمے خصوصی طور پی ٹی وی اتے ریڈیو پاکستان اچ 9 اگست 2023 توں ڳھن تے ہݨ تئیں کیتی ڳئی نویں بھرتیاں دا معاملہ تے وی غور کیتا ڳئیا۔ نگران وفاقی وزیر اطلاعات مرتضیٰ سولنگی اتے وفاقی سیکریٹری اطلاعات شاہیرہ شاہد ایں بارے قائمہ کمیٹی کوں بریفنگ ݙتی۔ ایم ڈی اے پی پی محمد عاصم کھچی کمیٹی کوں بریفنگ ݙتی جئیں تے کمیٹی اطمینان کیتا۔ اجلاس اچ کمیٹی دے ارکان سینیٹر مولا بخش چانڈیو، سینیٹر عرفان صدیقی، سینیٹر نسیمہ احسان شریک تھیے۔ وفاقی سیکریٹری اطلاعات شاہیرہ شاہد، ایم ڈی پی ٹی وی، ڈی جی ریڈیو اتے ایم ڈی اے پی پی وی اجلاس اچ موجود ہن۔