ریٹرننگ افسراں دا نوٹیفکیشن کجھ ݙینھ اچ جاری تھیسی ، عوام انتخابات دے سلسلے اچ افواہیں تے یقین نہ کرن،چیف الیکشن کمشنر

اسلام آباد۔7دسمبر(اے پی پی) چیف الیکشن کمشنرسکندر سلطان راجہ آکھیے الیکشن کمیشن کوں آپݨی ساری آئینی اتے قانونی ذمہ واریاں دا چنڳی طرح پتہ اے ، اساں شفاف اتے پرامن انتخابات کراوݨ سانڳے پوری طرح تیار تے پرعزم ہیسے ،الیکشن کمیشن تساکوں یقین ݙویندے جو الیکشن اچ تساکوں پورا تحفظ ݙتا ویسی تاں جو تساں مکمل رازداری اتے شفافیت نال آپݨا ووٹ دا حق استعمال کر سڳو۔ اے ڳالھ انہاں 7دسمبرکوں  قومی ووٹرز ڈے دے موقع تے آپݨے سنھیے اچ آکھی اے ۔ قومی ووٹرز ڈے دے موقع تے الیکشن کمیشن عوام  توں اپیل کیتی اے جو او ملک تے قوم دے روشن مستقبل سانڳے آپݨے ووٹ دا حق استعمال کرن ۔ الیکشن کمیشن نال تعاون کرن ، پرامن انتخابات کراوݨ کوں یقینی بݨاوݨ ۔عوام کوں یاد رکھݨا چاہیدے جو تساݙے ہتھاں اچ ووٹ دی طاقت اے۔اپݨے تے آپݨے ٻالاں دے مستقبل کوں سامݨے رکھ تے آپݨے ووٹ دا استعمال کرن ۔انتخابات دے سلسلے اچ کوڑیاں خبراں تے کن نہ ݙیون ۔چیف الیکشن کمشنرآپݨے سنھیے اچ عوام توں اپیل کیتی اے جو او انتخابی عمل اچ حصہ گھنن ، اے عوام دا حق وی ہے تے قومی فرض وی ۔الیکشن کمیشن ایں ویلھے آندے عام انتخابات دیاں تیاریاں اچ مصروف اے ۔ حتمی انتخابی فہرستاں دی پرنٹنگ و ترسیل دا کم مکمل تھی چکیے ۔الیکشن کمیشن کجھ ݙینھ اچ ڈسٹرکٹ ریٹرننگ افسراں، ریٹرنگ افسراں اتے اسسٹنٹ افسراں دا نوٹیفکیشن جاری کرݨ ویندا پئے ایندے نال ہی کجھ ݙینھ اچ الیکشن شیڈول ݙتا ویسی تے پولنگ 8 فروری 2024ء کوں تھیسی ۔