انتخابات 8 فروری کوں تھیسن ، ایں بارے کہیں کوں شک نی ہووݨا چاہیدا ، کہیں جماعت کوں اقتداراچ گھن آوݨ دا فیصلہ کرݨ دا اختیار عوام دا اے، نگراں وفاقی وزیر اطلاعات مرتضیٰ سولنگی دی پریس کانفرنس

کراچی ۔7دسمبر(اے پی پی) نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے انتخابات 8 فروری کوں تھیسن ، ایں بارے کہیں کوں شک نی ہووݨا چاہیدا ، کہیں جماعت کوں اقتداراچ گھن آوݨ دا فیصلہ کرݨ دا اختیار عوام دا اے، الیکشن کمیشن دی مالی، انتظامی اتے سیکورٹی ضرورتاں کوں پورا کریسوں ۔ اے ڳالھ انہاں خمیس کوں نگراں صوبائی وزیر اطلاعات احمد شاہ دے رلے پریس کانفرنس توں خطاب اچ آکھی اے ۔ مرتضیٰ سولنگی آکھیے ساݙی کوشش ہوسی جو وفاقی تے صوبائی حکومتاں وچال رابطے دا کوئی فقدان نہ ہووے،  ایں حوالے نال صوبائی وزراءاطلاعات نال رل تے حکمت عملی ترتیب ݙیسوں ۔ انہاں آکھیے جو کہیں جماعت کوں اقتدار اچ گھن آوݨ دا اختیار عوام دا اے، پاکستان دے آئین دی تمہید اچ لکھیے اے ملک ایندے منتخب نمائندے چلیسن انہاں آکھیے وݙے پالیسی فیصلے کرݨ منتخب پارلیمان دا کم اے، ساݙی کوشش اے جݙاں توں ساکوں حکومت ملی ایندے بعد حالات خراب نہ تھیون ۔ اساں بہتر حالت اچ ملک منتخب حکومت کوں ݙے تے ویسوں ۔ ھک سوال دے جواب اچ نگران وفاقی وزیر اطلاعات آکھیے جو الیکشن کراوݨ دی آئینی ذمہ واری الیکشن کمیشن آف پاکستان دی اے اتے اساں الیکشن کمیشن کوں مالی اتے انتظامی مدد ݙیندے پیوں ۔ ھک سوال دے جواب اچ نگران وفاقی وزیر اطلاعات آکھیے جو نگران وزیراعظم انوار الحق کاکڑ ݙو مہینے دے تھوڑے عرصے اچ کراچی دے کئی دورے کیتن ، نگران وزیراعظم پچھلے ݙینھاں کراچی دا دورہ کیتا اتھاں رہ وی ڳئن تے تاجراں نال ملاقات وی کیتی ۔ اڄ وی وزیراعظم کراچی دا دورہ کریندے پئن ، اسٹاک ایکسچینج دی تقریب اچ شرکت کریسن ۔ انہاں آکھیے نگران وزیراعظم دا صوبیں تے مختلف شہراں اچ ونڄݨ دا چنڳاں ریکارڈ اے ، تساں اتنا فرینڈلی وزیراعظم کݙاہیں وی نہ ݙٹھا ہوسی ۔ ھک ٻئے سوال دے جواب اچ مرتضیٰ سولنگی آکھیے سکیورٹی دا ݙر ہر الیکشن اچ رہیے ، 2008ءاچ الیکشن مہم دے دوران سابق وزیراعظم محترمہ بے نظیر بھٹو دی شہادت تھئی ہئی ، 2013ءدے انتخابات اچ وی سکیورٹی دا چیلنج موجود ہئی۔ انہاں آکھیے حالی تئیں ایجھی کوئی صورتحال نی بݨی جیں کوں ساݙے سکیورٹی ادارے کنٹرول نہ کرسڳن ۔