کامیابی پاکستان دا مقدراے ، پاک فوج مادر وطن  دی حفاظت دا مقدس فرض خون دے چھیکڑی قطرے تئیں نبھیندی رہسی ، جنرل سید عاصم منیر

راولپنڈی۔7دسمبر (اے پی پی) پاک فوج دے سربراہ جنرل سید عاصم منیر آکھیے جو کامیابی پاکستان دا مقدر اے ، پاک فوج مادر وطن دے ھک ھک انچ دی حفاظت دا بے لوث اتے مقدس فرض خون دے چھیکڑی قطرے تئیں نبھیندی رہسی ،پاکستان دے امن اتے استحکام سانڳےدشمن طاقتاں دے مذموم عزائم کوں ھک مٹھ تھی تے وݙی حکمت عملی نال ناکام بݨایا ویندا پئے ۔ آئی ایس پی آر موجب او پشاور دورے دے موقع تے خطاب کریندے پئے ہن ۔ آرمی چیف کوں سکیورٹی دی مجموعی صورتحال، انسداد دہشت گردی دے خلاف جاری کارروائیاں، غیر قانونی طورتے رہݨ آلے غیر ملکیاں دی وطن واپسی اتے نویں ضم شدہ ضلعیں اچ سماجی و اقتصادی ترقی دی پیش رفت بارے تفصیلی بریفنگ ݙتی ڳئی۔آرمی چیف انسداد دہشت گردی دی مختلف کارروائیاں دے دوران بہادری دا مظاہرہ کرݨ آلے پاک فوج دے افسراں اتے سپاہیاں نال ڳالھ مہاڑ کیتی ۔ آرمی چیف انہاں دی بہادری اتے مثالی کامیابیاں دی تعریف کریندے ہوئیں آکھیے قوم کوں آپݨی فوج تے فخر اے اتے او فوج دیاں کامیابیاں کوں منیندی اے ۔جنرل سید عاصم منیرآکھیے کامیابی ساݙا مقدر اے ، پاک فوج مادر وطن دے ھک ھک انچ دی حفاظت دا آپݨا بے لوث اتے مقدس فریضہ خون دے چھیکڑی قطرے تئیں ادا کریندی رہسی ۔آرمی چیف پہلی  قومی ورکشاپ خیبرپختونخوا (NWKP-1) دے شرکا توں خصوصی خطاب کیتا ۔ آپݨے خطاب اچ آرمی چیف  آکھیے سکیورٹی فورسز کوں خیبر پختونخوا دے غیور عوام دی پرعزم حمایت پاروں ہی صوبے اچ استحکام اتے سماجی تے اقتصادی ترقی دے منصوبیں تے پیشرفت ملی اے ۔ آرمی چیف آکھیے پاکستان دے امن تے استحکام دے خلاف دشمن طاقتاں دے مذموم عزائم کوں ھک مٹھ تھی تے وݙی حکمت عملی دے ذریعے ناکام بݨایا ویندا پئے۔ آرمی چیف نویں ضم تھئے ضلعیں اچ اقتصادی ترقی دی اہمیت کوں وی اجاگر کیتے ۔ آرمی چیف ایں ڳالھ تے وی روشنی پاتی جو غیر قانونی طور تے رہݨ آلے غیر ملکی پاکستان دی سلامتی اتے معیشت کوں ٻہوں متاثر کریندے پئن ، انہاں دی وطن واپسی دا فیصلہ حکومت ملک  دے وسیع تر مفاد اچ کیتے ، غیر قانونی غیر ملکیاں کوں طے کیتے ڳئے اصولاں موجب باعزت طریقے نال انہاں دے ملکاں اچ واپس بھیجیا ویندا پئے۔ ایندے توں پہلے آوݨ تے کور کمانڈر پشاور آرمی چیف دا استقبال کیتا۔