جدید تعلیم ساݙی ترجیح ، تعلیم یافتہ نینگر قوم دا مستقبل ہن،نگران وزیراعظم انوار الحق کاکڑ دا کیڈٹ کالج کوہاٹ اچ تقریب توں خطاب

کوہاٹ۔7دسمبر(اے پی پی) نگران وزیراعظم انوار الحق کاکڑ آکھیے جدید تعلیم ساݙی ترجیح اے، تعلیم یافتہ نینگر قوم دا مستقبل ہن، استاداں دا  تعلیمی نظام اچ اہم کرداراے، مادر علمی اچ گزاریاں ویلھا طالبیں کوں مستقبل دے چیلنج نال نبݨݨ سانڳے تیار کریندے ۔ اے ڳالھ انہاں کیڈٹ کالج کوہاٹ دے 58ویں والدین دے ݙینھ دی تقریب توں خطاب کریندے ہوئیں آکھی اے ۔ نگران وزیراعظم آکھیے کیڈٹ کالج دے 58ویں والدین دے ݙینھ دی تقریب اچ شرکت  تے نینگر کیڈٹس نال الواوݨ میں سانڳے اعزاز دی ڳالھ اے ۔ جدیدتعلیم خاص طور تے سائنس تے ٹیکنالوجی کہیں وی قوم دی ترقی دی ضمانت اے ۔ اساکوں خود کوں جدید تعلیم  نال جوڑݨ سانڳے اقدامات کرݨے ہوسن ۔ وزیراعظم آکھیے استاد تعلیمی نظام اچ وکھری حیثیت رکھیندن۔ ما پیو تے وی باری ذمے واری ہوندی اے ۔ وزیراعظم آکھیے کیڈٹ کالج کوہاٹ ہمیشہ بہترین نتیجے ݙتن ۔ وزیراعظم آکھیے اے کالج میݙا مادر علمی رہیے ۔میں1984 اچ بلوچستان دے ھک پسماندہ علاقے توں تعلیم سانڳے ایں کالج اچ آیا۔ میں زندگیاچ اڄ ایں جاہ تے پڄیاں تاں ایندا سہرا میݙے ایں مادر علمی دے استاداں دے سراے ۔ وزیراعظم کیڈٹس کوں آکھیے او محنت ، ایمانداری اتے لڳن نال اڳوں ودھدے ونڄن انہاں کیتے زندگی اچ چیلنج ہوسن ، اوکھ آسی لیکن کامیابی انہاں دا مقدر ہوسی ۔ وزیراعظم آکھیے ھک چنڳاں انسان بݨݨ ہی زندگی دی ساریں توں وݙی کامیابی اے۔ تقریب توں خطاب اچ نگران وزیراعظم  جیڑھے کیڈٹ کالج توں فارغ التحصیل ہن ، انہاں آپݨی مادر عملی دے ٻہوں سارے استاداں دا ناں گھن تے ذکر کیتا تے انہاں کوں یاد کریندے ہوئیں وزیراعظم رُنے ۔وزیراعظم آکھیے میں اچ اڄ جیڑھا کجھ چنڳاں اے ایندا سہرا میݙے استاداں تے سر اے ۔ ایندے توں پہلے پرنسپل بریگیڈیئر (ر) طفیل محمد خان آکھیےکیڈٹ کالج کوہاٹ ہمیشہ بہترین نتیجے ݙتن تے بورڈ امتحان اچ ٹاپ پوزیشن ڳھدن ۔ ایں توں انڄ اساں ہم نصابی سرگرمیاں اچ وی بہترین کارکردگی دا وی مظاہرہ کیتے۔ ۔وزیراعظم  کیڈٹس دی پریڈ دامعائنہ کیتا۔ وزیراعظم کوں کیڈٹس دے چاق  و چوبند دستے سلامی ݙتی ۔ انہاں چیمپئن  شپ دا پرچم  رستم ہاؤس دے حوالے کیتا۔ ایں موقع تے چیئرمین بورڈ آف گورنر میجر جنرل ذوالفقار علی بھٹی وی موجود ہن ۔وزیراعظم کیڈٹس دی طرفوں گھڑ سواری ، نیزہ بازی  اتے جمناسٹکس دا مظاہرہ وی ݙٹھا۔ وزیراعظم نصابی اتے ہم نصابی سرگرمیاں اچ بہترین کارکردگی دا مظاہرہ کرݨ آلے کیڈٹس کوں انعام ݙتے جݙاں جو کیڈٹ کالج  کوہاٹ دے پرنسپل وزیراعظم کوں کالج دا سوونیئر پیش کیتا۔