ساݙا مقصد اتے ہدف پی ٹی وی تےعلاقائی زباناں دی برابر نمائندگی یقینی بݨاوݨی اے ، نگران وفاقی وزیر اطلاعات مرتضیٰ سولنگی دا پی ٹی وی بولان تے ”ہزارگی زبان“ دے پروگرام دی افتتاحی تقریب توں خطاب

کوئٹہ۔19دسمبر(اے پی پی) نگران وفاقی وزیر اطلاعات، نشریات و پارلیمانی امور مرتضیٰ سولنگی پی ٹی وی بولان تے ”ہزارگی“ زبان اچ نشریات دے آغاز تے ہزارہ برادری کوں مبارخ ݙیندے ہوئیں آکھیے جو ساݙا مقصد تے ہدف پی ٹی وی تے علاقائی زباناں دی برابر نمائندگی کوں یقینی بݨاوݨاں اے ، پی ٹی وی بولان تے ہزارگی زبان دی نشریات ہزارہ برادری دا پراݨہ مطالبہ ہئی جیڑھا جو اڄ پورا تھیندا پئے ، پی ٹی وی بولان دی نشریات ہݨ عام انٹینا دے ذریعے پرے دے علاقیں تئیں ݙٹھیاں ونڄ سڳسن ۔ اے ڳالھ انہاں پی ٹی وی بولان تے ”ہزارگی زبان“ دے پروگرام دی افتتاحی تقریب توں خطاب کریندے ہوئیں آکھی اے ۔ تقریب اچ نگراں وزیراعظم انوار الحق کاکڑ بحیثیت مہمان خصوصی شرکت کیتی۔ نگران وفاقی وزیر اطلاعات مرتضیٰ سولنگی آکھیے پی ٹی وی بولان پہلے ہی بلوچی، پشتو اتے براہوی زباناں اچ اپݨی نشریات پیش کریندا پئے جݙاں جو اڄ ہزارہ برادری دے پراݨے مطالبہ تے ہزارگی زبان اچ وی نشریات دا آغاز کیتا ویندا پئے ۔ انہاں آکھیے جو پی ٹی وی بولان دی نشریات کیبل اتے سیٹلائٹ تے پہلے توں موجود ہن ، اے نشریات عام انٹینا دے ذریعے وی ݙٹھیاں ونڄ سڳسن جیں توں پرے دے علاقیں دے لوک فیدہ چا سڳسن جیڑھے جو سولر اتے انٹینا دے ذریعے پی ٹی وی بولان دی نشریات ݙیکھ سڳسن۔ انہاں آکھیے وزیراعظم انوار الحق کاکڑ دے شکر گزار  ہیسے جو انہاں ساݙے ایں اقدام دی حوصلہ افزائی کیتی ۔ نگران وفاقی وزیر آکھیے اساں اڄوکے مہینے پی ٹی وی ملتان دی نشریات دا دورانیہ ودھا تے 24 گھنٹے کیتے۔ انہاں آکھیے اساں ری براڈ کاسٹ سینٹرز دے ٹرانسمیٹرز دی تعداد وی ودھائی اے ، پہلے 22 ری براڈ کاسٹ سینٹرز کم کریندے پئے ہن ہݨ کان میترزئی اچ مزید ھک ری براڈ کاسٹ سینٹر بݨایا ڳئے جیں توں انہاں دی تعداد 23 تھی ڳئی اے ۔ انہاں آکھیے اے ری براڈ کاسٹ سینٹرز لوکاں تئیں پی ٹی وی دی نشریات پڄیندے پئن ۔ انہاں آکھیے ساݙا مقصد پی ٹی وی بولان تے علاقائی زباناں دی برابر نمائندگی یقینی بݨاوݨ اے۔