ملک اچ مسیحیاں سودھا ساریاں اقلیتاں کوں اسلامی تعلیمات، قائداعظم دے فرمودات اتے آئین پاکستان دے مطابق ہکو سویں حقوق ملیے ہوئن، صدر مملکت دا کرسمس تقریب نال خطاب

اسلام آباد۔21دسمبر(اے پی پی):صدر مملکت ڈاکٹر عارف علوی پاکستان سودھا ڄڳ اچ امن اتے بین المذاہب ہم آہنگی کیتے ودھ کوششاں تے زور ݙیندے آکھیے جو ملک اچ مسیحیاں سودھا ساریاں اقلیتاں کوں اسلامی تعلیمات، قائداعظم دے فرمودات اتے آئین پاکستان دے مطابق ہکو سویں حقوق ملیے ہوئن۔ اے ڳالھ انہاں وزارت مذہبی امور اتے بین المذاہب ہم آہنگی ولوں ایوان صدر اچ کرسمس دی تقریب نال خطاب اچ آکھی۔ صدر مملکت آکھیا جو رسول اکرم ﷺ اتے حضرت عیسیٰ علیہ السلام دے امن ومحبت دے سنیہے کوں عام کرݨ دی لوڑھ اے، کرسمس ہک اہم ݙینھ اے، کوئی وی مذہب انسانیت تے ظلم دی اجازت نئیں ݙیندا، ڄڳ توں ظلم اتے زیادتی مکاوݨ کیتے کٹھیاں کوششاں کرݨیاں ہوسن، ترقی یافتہ قوماں دا ڄڳ اچ تھیوݨ آلے ظلم تے چپ رہݨ افسوسناک اے، غزہ اچ نسیتاں تے گرجا گھراں کوں وی نشانہ ٻݨایا ویندا پئے، اڄ ایں ڳالھ دی لوڑھ اے جو ظلم، تصادم اتے تشدد توں بچدے ہوئے رواداری کوںو دھایا ونڄے، مسیحی برادری پاکستان دی تعمیر و ترقی اچ ودھ تے ہتھ ونݙائے۔ صدر مملکت تقریب اچ کرسمس کیک وی کٹیے۔ مسیحی ٻالاں کرسمس دے ڳاوݨے ڳائن۔ تقریب اچ خاتون اول بیگم ثمینہ علوی، نگراں وفاقی وزیر برائے مذہبی امور و بین المذاہب ہم آہنگی انیق احمد، اسلام آباد اچ غیر ملکی سفارتکاراں، مسیحی برادری دے مذہبی پیشواواں سودھا مختلف مذاہب دے رہنماواں شرکت کیتی۔ تقریب اچ مرکزی رویت ہلال کمیٹی دے چیئرمین مولانا سید عبدالخبیر آزاد اتے سینیٹر گردیپ سنگھ وی موجود ہن۔