مسیحی برادری ملکی سماجی، اقتصادی ترقی اچ اہم کردار ادا کیتے، صدر مملکت ڈاکٹر عارف علوی

اسلام آباد ۔24دسمبر(اے پی پی)صدر مملکت ڈاکٹر عارف علوی مسیحی برادری کوں کرسمس دی مبارک ݙیندے آکھیے جو مسیحی برادری ملکی سماجی، اقتصادی ترقی اچ اہم کردار ادا کیتے، پاکستان اچ اقلیتاں کوں ساریاں سیاسی، معاشی و سماجی حقوق ملیے ہوئن۔ کرسمس دے موقعے تے سنیہے اچ صدر ڈاکٹر عارف علوی آکھیے جو کرسمس مسیحی ٻھراواں کیتے اہم موقع اے جو او آزادی اتے خوشی نال مناون، مذاہب اتے ثقافتاں دا تنوع پاکستان کیتے استحکام دی وجہ اے، اساں ملک اچ امن، رواداری اتے ہم آہنگی دے ودھارے کیتے مسیحی برادری دیاں خدمتاں منیندے ہیں، اے موقع ساکوں اتحاد، افہام و تفہیم اتے خیر سگالی ودھاوݨ کیتے اڳو تے ودھیندے۔ انہاں آکھیا جو پاکستان اچ دستور پاکستان دے مطابق اقلیتاں کوں ساریاں سیاسی، معاشی و سماجی حقوق حاصل ہین، ساݙا مذہب اسلام اقلیتاں دے حقوق کوں منیدے اتے تحفظ کریندے، حکومت ملک اچ مذہبی اقلیتاں دے حقوق دے تحفظ کیتے پرعزم اے، اساں سارے رل تے اپݨی عظیم قوم کیتے ہک روشن مستقبل کیتے کم کر سڳدے ہیں۔