کرسمس محبت و اخوت، برداشت اتے ایثار دا ناں اے، نگران وزیر اعظم انوارالحق کاکڑ دا کرسمس تے سنیہا

اسلام آباد۔24دسمبر(اے پی پی)نگران وزیر اعظم انوارالحق کاکڑ کرسمس تے مسیحی برادری کوں مبارک ݙیندے آکھیے جو کرسمس محبت و اخوت، برداشت اتے ایثار دا ناں اے، کہیں وی معاشرے کوں ترقی دی راہ تے سٹݨ اچ انہاں دا اہم کردار ہوندے، اڄوکے دور اچ حضرت عیسٰی علیہ السلام دے انسانی ہمدردی، محبت، رواداری اتے بھرا بھرپی دے سنیہے تے عمل کرݨا چاہیدے، قائد دے پاکستان اچ ہر ڄݨے کوں مکمل مذہبی آزادی حاصل اے۔ نگران وزیرِ اعظم انوار الحق کاکڑ کرسمس تے اپݨے سنیہے اچ آکھیے جو حضرت عیسی دی اخلاقی تعلیمات اتے رہنمائی پورے ڄڳ تئیں بنی نوع انسان کیتے مشعل راہ  ہین، کڄھ سالاں اچ عالمی سطح تے مذہبی عدم برداشت دی لہر پاروں انسانی معاشرے اچ وگاڑ دی صورتحال رہی جیکوں مکاوݨ کیتے ساکوں حضرت عیسٰی علیہ السلام  دے ٻھرا ٻھرپی اتے مذہبی رواداری دا سنیہا عام کرݨ دی لوڑھ اے، ڄڳ کوں امن دا تھمبا ٻݨاوݨ کیتے ساکوں حضرت عیسٰی دے محبت و رواداری دے سنیہے کوں ودھاوݨا چاہیدے۔ نگران وزیر اعظم آکھیے جو پاکستان دے مسلے اوں ویلے مک سڳدن ڄݙاں اساں رنگ، نسل اتے مذہب توں ہٹ تے ایندی ترقی کیتے ہک قوم ٻݨ تے ݙینھ رات محنت کروں، پاکستان ساݙا سانڄھا ڳھر اے جیکوں اساں مذہبی رواداری اتے بھرا ٻھرپی دی مثال ٻݨیسوں۔