صدر مملکت ڈاکٹر عارف علوی دا ٻالاں کوں اعلیٰ تعلیمی مقاصد ڳھنݨ، قائد دے اصولاں تے چلݨ تے زور

اسلام آباد۔25دسمبر(اے پی پی):صدر مملکت ڈاکٹر عارف علوی ٻالاں کوں آکھیے جو او تعلیم اچ اعلیٰ معیار دے حصول اتے قائداعظم دے اتحاد، ایمان اتے نظم و ضبط دے اصول اپنا تے ملک کیتے اپݨا کردار ادا کرن۔ ایوان صدر اسلام آباد اچ “قائد اور بچے” دے ناں نال تقریب اچ الیندے انہاں آکھیا جو قائداعظم محمد علی جناح ہک عظیم رہنما ہن جنہاں دی جدوجہد نال ڄڳ اچ تبدیلی آئی، بانی پاکستان دکے  سوحݨے اقدار تے چلݨ نال ہی ملک ترقی کریسی، قائداعظم معاشی خوشحالی سانڳے تریمتیں اتے معاشرے دے ٻئے طبقیاں سودھا نینگراں اتے ٻالاں کوں وی مرکزی دھارے اچ ڳھن آوݨ چاہندے ہن، تحریک پاکستان اچ ٻال وی ہن ڄیڑھے اپݨے محبوب قائد نال محبت کریندے ہن اتے انڄھ وطن دی جدوجہد اچ ثابت قدم رہین۔ انہاں آکھیا جو اے وطن ہزاراں لوکاں دیاں قربانیاں نال ٻݨیے، ایکوں محنت اتے عزم نال مضبوط کرݨ دی لوڑھ اے۔

خاتون اول ثمینہ علوی، وزراء، ارکان پارلیمنٹ اتے معذور افراد سودھا سکول دے ٻالاں وی وݙی تعداد اچ ایں تقریب اچ شرکت کیتی۔ صدر مملکت ڈاکٹر عارف علوی اتے ثمینہ علوی ٻالاں نال رل تے قائداعظم دی سالگرہ دا کیک کٹیا۔

روایتی لباس اچ ٻالاں چارے صوبیاں اتے کشمیر دی ثقافت پیش کیتی اتے نغمیاں تے ڄھمراں پاتیاں۔ اکھیں توں متھاڄ ٻالاں وی’دل دل پاکستان‘ تے ٹیبلو کیتے۔