فری لانسرز ہݨ آپݨی ادائیگی پے پال توں وصول کر سڳسن، ڈاکٹر عمر سیف

اسلام آباد۔7جنوری  (اے پی پی) نگران وفاقی وزیر برائے انفارمیشن ٹیکنالوجی اتے ٹیلی کمیونیکیشن ڈاکٹر عمر سیف آکھیا جو فری لانسرز ہݨ آپݨی ادائیگی پے پال توں وصول کر سڳسن۔ آپݨے ویڈیو سنیھے اچ انہاں آکھیا جو فری لانسرز دا اے پراݨا مطالبہ ہئی جو پاکستان اچ ادائیگی کیتے پے پال تئیں رسائی ݙتی ونڄے۔ وفاقی وزیر آکھیا جو پے پال خود پاکستان نی امدا پئیا پر کمپنی نال ہک معاہدہ تھی ڳئے جئیں دے تحت ترسیلات زر ، پے پال  تریجھے فریق دے ذریعے منتقل کیتا ویسی۔ انہاں آکھیا جو فری لانسرز کوں پے پال اکاؤنٹ کھولݨ دی ضروری کائنا ہوسی۔ ٻاہرلے ملک توں آپݨے پے پال اکاؤنٹس توں ادائیگی کریسن اتے فنڈز فوری طور فری لانسرز دے اکاؤنٹس اچ جمع کر ݙتے ویسن۔ انہاں آکھیا جو وفاقی کابینہ ولوں منظور تھئی پالیسی دے تحت بین الاقوامی کمپنیاں کوں ڳھٹ مدار اچ مواصلاتی سیٹلائٹس دے ذریعے مواصلاتی خدمات ݙیندے پئن۔ عمر سیف آکھیاجو سیٹلائٹ کمیونیکیشن ٹیکنالوجی تکھے کم کریندی پئی اے اتے دنیا دی ٻہوں نجی کمپنیاں ڳھٹ مدار آلے سیٹلائٹس دے ذریعے مواصلاتی خدمات ݙیوݨ چاہندن۔ انہاں آکھیا جو ملک اچ 5G خدمات ایں سال جولائی تئیں شروع کر ݙتی ویسن اتے 300میگا ہرٹس  سپیکٹرم نیلامی کیتے پیش کیتا ویسی۔ انہاں آکھیا جو 5 جی  سروسز دے آغاز توں پہلے آپٹک فائبر نیٹ ورک کوں ودھاوݨا پوسی۔ ایں ویلھے ملک اچ لگ بھگ 56,000 ٹاورز اچوں صرف 6,000 موبائل ٹاور آپٹک فائبر نال جڑین۔