گلوبل ہیلتھ سکیورٹی سمٹ کراوݨ پاکستان کیتے اعزاز اے، مرتضیٰ سولنگی

اسلام آباد۔9جنوری  (اے پی پی) نگران وفاقی وزیر اطلاعات، نشریات تے پارلیمانی امور مرتضیٰ سولنگی آکھیا جو گلوبل ہیلتھ سکیورٹی سمٹ 2024ء کراوݨ پاکستان کیتے اعزاز اے۔ اے ڳالھ انہاں منگل کوں نگران وفاقی وزیر برائے قومی صحت ڈاکٹر ندیم جان دے رلے پریس کانفرنس کریندیں ہوئیں آکھی۔ ایں موقع تے پرنسپل انفارمیشن آفیسر ڈاکٹر طارق محمود خان وی موجود ہن۔ پریس کانفرنس توں خطاب کریندیں ہوئیں نگران وفاقی وزیر اطلاعات آکھیا جو گلوبل ہیلتھ سکیورٹی سربراہ کانفرنس 10 اتے 11 جنوری کوں وفاقی دارالحکومت اسلام آباد اچ تھیندی پئی اے۔ انہاں آکھیا جو پاکستان دی تاریخ اچ اے کانفرنس پہلی واری تھیندی پئی اے جوپاکستان کیتے اعزاز اے۔