الیکشن کمیشن دا ضابطہ اخلاق دی خلاف ورزی تے چیئرمین تحصیل کونسل گمبٹ کوں 50 ہزار روپے جرمانہ

اسلام آباد۔25جنوری(اے پی پی) الیکشن کمیشن ضابطہ اخلاق دی خلاف ورزی تے چیئرمین تحصیل کونسل گمبٹ کوں 50 ہزار روپے جرمانہ کرݙتے، ضابطہ اخلاق دی خلاف ورزی تے چارے صوبیں اچ ہݨ تئیں مختلف امیدواراں اتے ٻئیں کوں 64 نوٹس جاری کیتے ڳئن ، ہݨ تئیں 18 امیدواراں اتے بلدیاتی نمائندیں کوں جرمانے کیتے ڳئن ۔ الیکشن کمیشن توں جاری بیان اچ  ترجمان آکھیے الیکشن کمیشن دی  ہدایات دی روشنی اچ ضابطہ اخلاق دی خلاف ورزیاں دے خلاف کارروائیاں جاری ہن۔ ڈسٹرکٹ مانیٹرنگ آفیسر کوہاٹ  ݙو واری نوٹس جاری تھیوݨ دے باوجود عدم حاضری دی بنا ء تے کاروائی کریندے ہوئیں چیئرمین تحصیل کونسل گمبٹ ساجد اقبال  کوں 50 ہزار روپے جرمانہ کرݙتا۔ترجمان موجب ڈسٹرکٹ مانیٹرنگ آفیسر کوہاٹ کوں سوشل میڈیا دے ذریعے پتہ لڳے جو تحصیل چیئرمین ساجد اقبال این اے 35 کوہاٹ توں امیدوار شہریار خان آفریدی  ، پی کے 90 اتے پی کے 92 دے امیدواراں سانڳے انتخابی مہم چلیندا پئے تے ورکرز کنونشن اچ وی شرکت کیتی جیڑھی جو ضابطہ اخلاق دی خلاف ورزی دے زمرے اچ آندے جیں تے  17  اتے 18  جنوری کوں انہاں کوں طلبی دے نوٹس جاری کیتے ڳئن لیکن ایندے با وجود او ڈسٹرکٹ مانیٹرنگ افسردے دفتر اچ پیش نی تھئے ۔ چارے صوبیں اچ ہݨ تئیں مختلف خلاف ورزیاں تے 64 کوں نوٹس جاری کیتے ڳئن تے انہاں تے کاروائی جاری اے ۔ ہݨ تئیں مجموعی طور تے 18 امیدواراں تےلوکل گورنمنٹ دے چیئرمین و ڈسٹرکٹ چیئرمین کوں جرمانے تھی چکن ۔