پاکستان سودھے پوری دنیا دے مسلمان 5 فروری کوں یکجہتی کشمیر دا ݙینھ منیسن ،طاہر محمود اشرفی

لاہور۔3فروری  (اے پی پی):نگران وزیراعظم دے نمائندہ خصوصی وچیئر مین پاکستان علما ء کونسل حافظ طاہر محمود اشرفی آکھیے پاکستان سودھے پوری دنیا دے مسلمان 5 فروری کوں یکجہتی کشمیر دا ݙینھ منیسن ، ساریاں سیاسی جماعتاں کوں آپت دے اختلافات ختم کرتے ھک پیج تے کٹھا تھیوݨا چاہیدے،کشمیر دی آزادی سانڳے دنیا کوں ھک مٹھ کرݨا ہوسی ، اقوام متحدہ دی قرار داداں دے تحت مسئلہ کشمیر حل کیتا ونڄے۔ اے ڳالھ انہاں جامعہ منظور اسلامیہ اچ پریس کانفرنس توں خطاب کریندے ہوئیں آکھی اے ۔ ایں موقع تے مولانا اسداللہ فاروق، علامہ پیر زبیر عابد،مولانا محمد اصغر صدیقی، مولانا عبدالحکیم اطہر ، مفتی نسیم الاسلام، مولانا محمد اسلم قادری ، مولانا مبشر رحیمی تے ٻئے موجود ہن ۔ حافظ طاہر محمود اشرفی آکھیے 5 فروری کوں پاکستان و دنیا اچ یوم  یکجہتی کشمیر منایا ویندے ،دنیا دے ݙو مسئلے ایجھے ہن جیڑھے جو 75 سال توں حل طلب ہن ، انہاں اچ ھک مسئلہ فلسطین اتے ݙوجھا کشمیر اے، بھارت او کجھ کشمیریاں نال کریندا پئے جیڑھا اسرائیل فلسطینیاں نال کریندا پئے ۔ انہاں آکھیے اقوام متحدہ دی قرارداداں تے عالمی انسانی حقوق دے ادارے کشمیریاں اتے فلسطینیاں تے کیتے ونڄݨ آلے ظلم کوں رکواوݨ اچ کردار نبھاون ،پنج فروری مظلوم کشمیریاں نال یکجہتی دا ݙینھ اے ، ایں ݙینھ اے سنھیا ݙیوݨا اے جو کشمیر کوں بھارت توں کیویں نجات گھنݨی اے ۔ ایں سلسلے اچ ساریاں سیاسی و مذہبی جماعتاں پنج فروری کوں پورے ملک اچ یکجہتی کشمیر دے ݙینھ تے اجتماعات منعقد کریسن تے کشمیریاں دی آواز نال آواز رلیسن ۔