پاکستان خطے اچ امن ودھاوݨ، جھیڑے مکاؤݨ اتے فریقین کوں مذاکرات تے مناوݨ کیتے ہمیشہ اہم کردار نبھائے، محسن نقوی

دوحہ۔19 اکتوبر(اے پی پی)وفاقی وزیرِ داخلہ محسن نقوی آکھیے جو پاکستان خطے اچ امن ودھاوݨ، جھیڑے مکاؤݨ اتے فریقین کوں مذاکرات تے مناوݨ کیتے ہمیشہ اہم کردار نبھائے۔ قطر دے دارالحکومت دوحہ اچ’گلوبل سکیورٹی فورم 2026ء‘ نال خطاب کریندے وفاقی وزیرِ داخلہ آکھیا جو ایران اتے امریکہ دے جھیڑے اچ پاکستان ہمیشہ امن اتے ڳالھ مہار دا رستہ چݨیے، ایں سانڳے پاکستان دے چیف آف ڈیفنس فورسز، فیلڈ مارشل سید عاصم منیر اہم کردار ادا کیتے جو انہاں دے عالمی قائدین نال رابطیاں اتے مسلسل سفارتی کوشساں مذاکرات دیاں راہواں کھولین۔ انہاں ݙسایا جو تہران دے دوریاں اتے اعلیٰ سطح دے رابطیاں نال خطے اچ کشیدگی گھٹاوݨ اچ مدد ملی، سوئٹزرلینڈ دے لیک لوزین سمٹ اچ پاکستان اتے قطر ثالثی نبھائی۔ انہاں آکھیا جو پاکستان، سعودی عرب اتے ترکیہ دے مکہ جوائنٹ ڈیفنس معاہدہ دفاعی تعاون دا ثبوت اے۔ دہشتگردی دے خلاف پاکستان دیاں قربانیاں دا ݙسیندے انہاں آکھیا جو ساݙے ہزاراں شہریاں، فوجیاں اتے پولیس اہلکاراں جاناں قربان کیتن اتے پاکستان اقوامِ متحدہ دے امن مشنز اچ وی ہراول دستے دا کردار ادا کیتے۔ انہاں عالمی برادری تے زور ݙتا جو دہشتگردی مکاوݨ کیتے مشترکہ انٹیلی جنس شیئرنگ اتے قریبی تعاون ضروری اے۔ انہاں واضح کیتے جو پاکستان جنگاں رکواوݨ دا کوئی کریڈٹ نئیں چاہندا ٻھل ہک اینڄھا پرامن مستقبل چاہندے جتھاں سرے توں جنگاں شروع ہی نہ تھیون۔