وفاقی وزیر شزا فاطمہ خواجہ دی جنوبی کوریا اچ “گلوبل اے آئی اینڈ ڈیجیٹل سمٹ 2026ء” اچ شرکت

اسلام آباد/ سیئول۔19 اکتوبر(اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزا فاطمہ خواجہ جنوبی کوریا دے دارالحکومت سیئول اچ منعقدہ “گلوبل اے آئی اینڈ ڈیجیٹل سمٹ 2026ء” اچ پاکستان دی نمائندگی کریندے واضح کیتے جو پاکستان غیر ملکی ماڈلاں تے انحصار ختم کرݨ کیتے ‘سوویرن اے آئی’ (خودمختار مصنوعی ذہانت) دے ودھارے تے بھرپور توجہ مرکوز کیتی ہوئی اے، اے عالمی سمٹ کوریائی حکومت تے ورلڈ بینک دے سانجھے اشتراک نال منعقد کیتی ڳئی جیندے اچ دنیا توں وزراء تے ٹیکنالوجی ماہرین شرکت کیتی۔سمٹ دے منسٹریل اجلاس نال خطاب کریندے وفاقی وزیر شزا فاطمہ خواجہ شرکاء کوں پاکستان دی ‘نیشنل اے آئی پالیسی 2025ء’ تے ملک اچ جدید ڈیجیٹل انفراسٹرکچر دے حوالے نال تھیوݨ آلی ٹھوس پیشرفت دا ݙسایا۔ انہاں آکھیا جو پاکستان تے ورلڈ بینک وچال ‘ڈیجیٹل اینڈ اے آئی کمپیکٹ 2026–2030’ ہݨ حتمی مرحلے اچ داخل تھی چکیے جیڑھا جو ملک اچ ڈیجیٹل انقلاب دا رستہ ہموار کریسی۔شزا فاطمہ خواجہ ݙسایا جو حکومت سال 2035ء تئیں 12 ترجیحی شعبیں دی مکمل ڈیجیٹلائزیشن کیتے ‘نیشنل ڈیجیٹل ماسٹر پلان’ منظور کرڳھدے۔ جامع حکومتی اصلاحات دے مثبت اثرات دا ذکر کریندے انہاں آکھیا جو اقوامِ متحدہ دے ای-گورنمنٹ ڈویلپمنٹ انڈیکس اچ پاکستان نمایاں طور تے 14 درجے بہتری حاصل کیتی اے جیڑھا جو پالیسیاں دے درست سمت اچ تھیوݨ دا واضح ثبوت اے۔انسانی وسائل دی ترقی دے حوالے نال ڳالھ کریندے وفاقی وزیر اعلان کیتا جو حکومت 10 لکھ غیر آئی ٹی پیشہ ور لوکاں کوں اے آئی دی بنیادی و جدید تربیت ݙیسی جݙاںجو ایں شعبے اچ تحقیق دے ودھارے کیتے 1,000 پی ایچ ڈی سکالرشپس ݙتیاں ویسن۔ انہاں عالمی اداریں تے زور ݙتا جو مصنوعی ذہانت دے منصفانہ تے محفوظ استعمال کیتے بین الاقوامی سطح تے مؤثر قانون سازی دی لوڑھ اے۔ انہاں دا آکھݨ ہئی جو پاکستان اچ شہریاں دے حقوق دے تحفظ تے ڈیٹا سکیورٹی کوں یقینی بݨاوݨ کیتے شفاف قانونی فریم ورک تشکیل ݙتا ویندا پیئے۔سمٹ دی سائیڈ لائنز تے وفاقی وزیر شزا فاطمہ خواجہ ٹیکنالوجی کمپنی ‘گوگل’ دے نائب صدر ولسن وائٹ نال وی اہم ملاقات کیتی جیندے اچ پاکستان تے گوگل وچال طے پاوݨ آلے اڄوکے معاہدیں تے ڈیجیٹل منصوبیں تے پیشرفت دا تفصیلی جائزہ ڳھدا ڳیا۔