بھارت دےغیر قانونی زیرتسلط کشمیر اچ وسݨ آلے مظلوم کشمیریاں نال یکجہتی سانڳے یکجہتی کشمیر ݙینھ صبحائیں منایا ویسی

اسلام آباد۔4فروری  (اے پی پی) بھارت دےغیر قانونی زیرتسلط کشمیر اچ وسݨ آلے مظلوم کشمیریاں نال یکجہتی سانڳے یکجہتی کشمیر ݙینھ صبحائیں منایا ویسی۔ ۔ وزارت امور کشمیر و گلگت بلتستان یکجہتی کشمیر ݙینھ مناوݨ دے حوالے نال تیاریاں مکمل کر ڳھدن ۔ اندرلے تے ٻاہرلے ملک پاکستانی اپݨے کشمیری بھراویں تے بھیݨاں نال بھرپور یکجہتی دا اظہار کریسن ۔ جاری اعلامیہ اچ آکھیا ڳئٖ جو ایں ݙینھ پورے ملک اچ عام چھٹی ہوسی ۔شاہراہ دستور اسلام آباد تے کشمیری عوام نال یکجہتی سانڳے ریلی کڈھی ویسی ۔ریلی اچ اہم وفاقی وزرا اتے عوام دی وݙی تعداد شرکت کریسی ۔کشمیری شہدا کوں خراج عقیدت پیش کرݨ سانڳے 5 فروری کوں سویلے 09:30 تے ھک منٹ سانڳے چُپ کیتی ویسی ۔صدر اتے وزیر اعظم پاکستان دے یوم یکجہتی کشمیر دے حوالے نال خصوصی سنھیے نشر کیتے ویسن ۔ ٻاہرلے ملک قائم پاکستانی مشنز  خصوصی ریلیاں،سیمینارز،تصویری نمائشاں دا انعقاد کریندے پئن ۔وزارت خارجہ ایں ݙینھ دے حوالے نال اسلام آباد اچ غیر ملکی سفیراں دی بریفننگ دا وی انعقاد کیتے۔اسلام آباد اچ پی این سی اے اتے لوک ورثہ اچ تقریباں جاری ہن جنھاں اچ کشمیری ثقافت کوں اجاگر کیتا ویندا پئے ،پرنٹ والیکٹرونک میڈیا  توں علاوہ سوشل میڈیا تے وی کشمیریاں نال بھرپور یکجہتی دا اظہار کیتا ویندا پئے ۔وزارت اطلاعات و نشریات،ریاستی ٹی وی چینلزاتے ریڈیو دے ذریعے مختلف پروگرامز نشر کریندا پئے ۔پرائیویٹ میڈیا چینلز اتے ایف ایم ریڈیو وی یوم یکجہتی کشمیر کوں بھرپور کوریج ݙیسن ۔سول ایویشن،پاکستان ریلوے،میٹرو بس اتے این ایچ اے ہوائی اݙیں ،ریلوے اسٹیشن،میٹرو بس سٹیشن اتے ٹول پلازیں تے یوم یکجہتی کشمیرد ےحوالے نال بینرز لاݙتے ڳئن۔