بھارت کشمیر اچ جو کڄھ کریندا پئے او کہیں انسانی المیہ توں ڳھٹ کائنی، انسانی حقوق دی خلاف ورزیاں اتے خونریزی تے بھارت کوں جوابدہ ہووݨا چاہیدے،نگران وزیراعظم انوار الحق کاکڑ دا آزاد کشمیر قانون ساز اسمبلی توں خطاب

مظفر آباد۔5فروری  (اے پی پی) نگران وزیراعظم انوار الحق کاکڑ کشمیریاں دی انہاں دے حق خودارادیت کیتے جدوجہد کوں چھیکڑی انجام تئیں پڄاوݨ کیتے پاکستان دی حمایت دا عزم کریندیں ہوئیں آکھیا جو   بھارت اقوام متحدہ دی قرارداداں اتے جموں و کشمیر دی عوام دی خواہشات دے خلاف کوئی چھیکڑی حل مسلط نی کر سڳدا۔ کشمیر اچ جو کڄھ کریندا پئے او کہیں انسانی المیہ توں ڳھٹ کائنی، انسانی حقوق دی خلاف ورزیاں اتے خونریزی تے بھارت کوں جوابدہ ہووݨا چاہیدے۔ اے ڳالھیں انہاں سنوار کوں یوم یکجہتی کشمیر دے موقع تے آزاد کشمیر قانون ساز اسمبلی دے خصوصی اجلاس توں خطاب کریندیں ہوئیں آکھی۔  وزیراعظم انوار الحق کاکڑ آکھیا جو ہر سال 5 فروری کوں پاکستان دی حکومت اتے عوام یوم یکجہتی کشمیر منیندن اے جموں تے کشمیر دی عوام نال یکجہتی دا ݙینھ اے۔ ہر سال اساں جموں تے کشمیر دے ٻھراواں نال غیر ملکی قبضے دے خلاف انہاں دی حق خودارادیت کیتے جائز جدوجہد اچ نال کھڑم دا عہد کریندوں۔ انہاں آکھیا جو قائداعظم محمد علی جناح کشمیر کوں پاکستان دی شہ رگ قرار ݙتے۔ کشمیر دے بغیر پاکستان نامکمل اے۔ اساں جموں تے کشمیر تنازعے دے اہم فریق ہیسے۔ بھارت جموں تے کشمیر دی عوام دی خواہش دے خلاف کوئی حل مسلط نی کر سڳدا۔ کشمیر کاز کیتے اساݙا عزم پکا اے۔ انہاں آکھیا جو پاکستان حقِ خود ارادیت ڳھنݨ تئیں آپݨے کشمیری ٻھیݨ ٻھراواں دی اخلاقی سیاسی اتے سفارتی مدد کریندا رہسی۔انہاں آکھیا جو بھارت دے غیرقانونی زیرقبضہ جموں تے کشمیر کھلی جیل وانڳوں اے۔ انہاں آکھیا جو کشمیری ݙر خوف دے ماحول اچ رہندے پئن۔ میڈیا تے پابندیاں ہن، کارکن جیلاں اچ بند ہن، انہاں دی زمیناں ضبط تھیندی پئن۔ ثقافت تے حملہ تھیندا پئے۔ آزادی پسند کشمیریاں دی جائیداں کھسی ویندی پئن۔ گزریل 45 سالیں اچ 96 ہزار توں ودھ کشمیری شہید تھی ڳئن۔ ہزاراں تریمتیں کوں ہراساں کیتا ڳئے۔ اے سارے ظلم مُکݨے چاہیدن۔ دنیا کوں ݙساوݨ چاہندوں جو کجھ کشمیر اچ تھیندا پئے او انسانی المیے توں ڳھٹ کائنی۔ مقبوضہ کشمیر اچ انسانی حقوق دی خلاف ورزیاں اتے خونریزی تے بھارت کوں جوابدہ ہووݨا چاہیدے۔ انہاں آکھیا جو بھارت دے غیرقانونی زیرتسلط جموں و کشمیر دی حیثیت بارے بھارتی سپریم کورٹ دا فیصلہ کشمیری عوام دے حق خودارادیت توں انکار آلے پاسے اہم قدم اے ایجھے فیصلیاں نال کشمیری عوام دی امنگاں کوں مجروع نی کیتا ونڄ سڳدا۔ انہاں آکھیا جو پاکستان حکومت اتے عوام کشمیریاں دی جدوجہد آزادی کوں چھیکڑی انجام تئیں پڄاوݨ کیتے  پرعزم ہن۔ دنیا دے سامھے بھارت دا چہرہ بے نقاب کریسوں۔ سفارتی مہم جاری رہسی۔ کشمیریاں دے حق خودارادیت ڳھنݨ تئیں چین نال کائنا ٻہسوں۔