مسلح افواج دی عام انتخابات 2024 دے پرامن اتے تشدد توں پاک انعقاد تے قوم کوں مبارکباد

راولپنڈی۔8فروری(اے پی پی)ملک دی مسلح افواج عام انتخابات 2024 دے پرامن اتے تشدد توں پاک انعقاد تے قوم کوں مبارکباد ݙیندے آکھیے جو مسلح افواج کوں سکیورٹی اداریاں نال رل تے انتخابی عمل اچ مکمل سکیورٹی ݙیوݨ تے ماݨ اے، مسلح افواج آئینی اختیارات دے تحت  انتخابات پرامن کراوݨ کیتے محنت کیتی اے، امید اے جو ساݙیاں قربانیاں نا ونڄیسن اتے اے انتخابات پاکستان اچ جمہوریت ٻئی تکڑی کرݨ اچ  ہتھ ونݙیسی جیندے نال پاکستانی عوام دیاں امنگاں پوریاں تھیسن۔ آئی ایس پی آر آکھیے جو عام انتخابات 2024 اچ تقریباً 6,000  انتہائی حساس پولنگ سٹیشناں تے 7800 توں ودھ کوئیک رسپانس اتے مجموعی 137,000 فوجی جواناں اتے سول آرمڈ فورسز محفوظ ماحول یقینی ٻݨائے، خیبرپختونخوا اتے بلوچستان اچ 51 بزدلانہ دہشت گردانہ حملیاں دا مقصد انتخابی عمل کوں متاثر کرݨ ہا، ایندے باوجود پاک فوج پرعزم رہی اتے پورے پاکستان اچ امن و سلامتی  کوں مؤثر ٻݨائے، انہاں حملیاں اچ 10 سکیورٹی اہلکاراں سودھا 12 ڄݨے شہید اتے 39 ٻئے زخمی تھئن، فعال انٹیلی جنس حکمت عملی اتے فوری کارروائی نال ٻہوں ممکنہ خطرات ناکام ٻݨائے ڳن ڄیڑھا شہریاں دے جمہوری حقوق دے تحفظ کیتے ساݙیاں سیکورٹی ایجنسیاں دے غیر متزلزل عزم کوں ݙسیندے، مختلف کارروائیاں اچ 5 دہشت گرد وی ماریے گئے، قانون نافذ کرݨ آلے ٻئے اداریاں دا شکریہ ادا کریندے ہیں ڄئیں جمہوری عمل دے تحفظ کیتے مسلح افواج نال رل تے کم کیتے، مسلح افواج ملک اچ امن و سلامتی برقرار رکھݨ کیتے پرعزم ہیں اتے ساݙی ریاست دی جمہوری روایات دے تحفظ کیتے غیر متزلزل حمایت ݙیوݨ کیتے تیار ہیں۔