نیشنل انفارمیشن ٹیکنالوجی بورڈ اتے پاکستان سوسائٹی آف انٹروینشنل کارڈیالوجی وچال امراض قلب توں بچݨ تے علاج سانڳے تعاون دا معاہدہ

لاہور۔14فروری(اے پی پی) امراض قلب دے خطرے توں بچݨ تے علاج سانڳے نیشنل انفارمیشن ٹیکنالوجی بورڈ اتے پاکستان سوسائٹی آف انٹروینشنل کارڈیالوجی وچال سانجھے تعاون دا معاہدہ طے پا ڳئے۔ترجمان موجب معاہدہ دے تحت نیشنل انفارمیشن ٹیکنالوجی بورڈ (این آئی ٹی بی) امراض قلب توں بچݨ تے ہارٹ اٹیک دے امراض دے وختی علاج معالجہ سانڳے آن لائن ڈیٹا دی تیاری اتے تحقیق سانڳے پاکستان سوسائٹی آف انٹروینشنل کارڈیالوجی (پی ایس آئی سی) کوں ڈیجیٹل اتے ٹیکنیکل تعاون ݙیسی۔ایں حوالے نال مقامی ہوٹل اچ معاہدہ تے  دستخط سانڳٖ تقریب منعقد کیتی ڳئی ۔ تقریب اچ نگران وفاقی وزیر انفارمیشن ٹیکنالوجی و ٹیلی کمیونیکیشن ڈاکٹرعمر سیف بطور مہمان خصوصی شرکت کیتی جݙاں جو چیف ایگزیکٹو افسر نیشنل انفارمیشن ٹیکنالوجی بورڈ ڈاکٹر بابر ماجد بھٹی، صدر پاکستان سوسائٹی آف انٹروینشنل کارڈیالوجی پروفیسر ڈاکٹر زبیر اکرم، نائب صدر پروفیسر ڈاکٹر نعمان نصیر تے ٻئے موجود ہن ۔سی ای  او نیشنل انفارمیشن ٹیکنالوجی بورڈ ڈاکٹر بابر ماجد بھٹی وفاقی وزیر کوں ایں معاہدے دے خدوخال بارے بریفننگ ݙتی تے ݙسایا جو معاہدے دا مقصد دل دا دورہ پووݨ آلے مریضاں دے وختی تے مناسب علاج و طبی سہولتاں ݙیوݨ دے سلسلے اچ آن لائن ڈیٹا بیس تیار کرݨا اے ۔ انہاں آکھیے دل دے دورے دے مریضاں دی ابتدائی تے ثانوی پیچیدگیاں روکݨ سانڳے اے معاہدہ ٻہوں معاون و مددگار ثابت تھیسی ۔ تقریب توں خطاب اچ نگران وفاقی وزیر ڈاکٹر عمر سیف این آئی ٹی بی اتے پی ایس آئی سی دے ایں اقدام دی تعریف کیتی تے آکھیے جو انفارمیشن ٹیکنالوجی دا استعمال صحت سودھے ہر شعبے اچ ھک بنیادی اہمیت اختیار کر چکیے ، حکومت آئی ٹی دے ودھارے سانڳے سارے وسائل بروئے کار گھن آندی پئی اے ۔ انہاں آکھیے اے شاندار منصوبہ اے جیں توں قیمتی انسانی زندگیاں بچاوݨ اچ مدد ملسی ۔