نائب وزیراعظم تے وزیرِ خارجہ محمد اسحاق ڈار 19 تے 20 اکتوبر کوں تاجکستان اچ تھیوݨ آلے ایس سی او دے سربراہانِ حکومت دی کونسل دے اجلاس اچ پاکستانی وفد دی قیادت کریسن

اسلام آباد۔19 اکتوبر (اے پی پی) نائب وزیراعظم تے وزیرِ خارجہ محمد اسحاق ڈار 19 تے 20 اکتوبر کوں تاجکستان دے شہر دوشنبے اچ تھیوݨ آلے شنگھائی تعاون تنظیم (ایس سی او) دے سربراہانِ حکومت دی کونسل (سی ایچ جی) دے اجلاس اچ پاکستانی وفد دی قیادت کریسن۔ سنوار کوں دفترِ خارجہ توں جاری بیان دے مطابق نائب وزیراعظم تے وزیرِ خارجہ سینیٹر محمد اسحاق ڈار تاجکستان دے وزیراعظم قاہر رسول زادہ دی دعوت تے اے دورہ کریندی پئن۔ اجلاس اچ بیلاروس، چین، قازقستان، کرغزستان، روس، تاجکستان تے ازبکستان دے وزرائے اعظم، ایران دے نائب صدر تے بھارت دے وزیرِ خارجہ آپݨے آپݨے ملکاں دی نمائندگی کریسن۔ سی ایچ جی شنگھائی تعاون تنظیم دا ݙوجھا اعلیٰ ترین فیصلہ ساز ادارہ اے جیڑھا جو تنظیم دے اقتصادی، مالیاتی، تجارت، رابطہ کاری، کاروبار، سماجی تے اقتصادی تعاون تے بجٹ نال متعلق امور اچ رہنمائی فراہم کریندے۔ سی ایچ جی ہک مشترکہ اعلامیہ، بیانات تے اہم فیصلیاں دی وی منظوری ݙیسی۔ دورے دے دوران نائب وزیراعظم تے وزیرِ خارجہ تاجکستان دے صدر تے وزیراعظم نال وی ملاقات کریسن، جݙانجو سی ایچ جی اجلاس دے موقع تے شنگھائی تعاون تنظیم دے رکن ملکاں دے آپݨے ہم منصباں دے نال ݙوپاسہ ملاقاتاں وی کریسن۔