نگران وزیرِ اعظم انوار الحق کاکڑ نال پاکستان ایسوسی ایشن آف لارج اسٹیل پروڈیوسرز دے وفد دی ملاقات

اسلام آباد۔15فروری(اے پی پی)نگران وزیرِ اعظم انوار الحق کاکڑ آکھیے جو حکومت نجی کاروباری شعبے کوں ملکی برآمدات اچ ودھارے اتے روزگار ݙیوݨ کیتے سوکھ ݙیندی پئی اے، امید اے آندی منتخب حکومت پالیسیاں دے تسلسل پاروں ملک اچ صنعتی ترقی و سرمایہ کاری اچ ودھارے نال لوکاں کوں روزگار دے مواقع اتے مجموعی معاشی ترقی دے پندھ کوں جاری رکھسی۔ اے ڳالھ انہاں سینیٹر نعمان وزیر دی قیادت اچ پاکستان ایسوسی ایشن آف لارج اسٹیل پروڈیوسرز دے وفد نال ملݨ ویلھے آکھی۔ وفد اچ سینیٹر نعمان وزیر، گورنر سٹیٹ بینک جمیل احمد، چیئرمین ایف بی آر، متعلقہ وزارتاں دے سیکرٹریز اتے پاکستان ایسوسی ایشن آف لارج سٹیل پروڈیوسرز دے عہدیداران اتے خیبر پختونخوا دے ٻئے شعبیاں دے صنعتکار وی موجود ہن۔

انہاں اکھیا جو نگران حکومت کاروبار کیتے بہترین ماحول، نجی شعبے کوں ملکی ترقی اچ کردار کیتے سہولت اتے ٹیکس آمدن اچ ودھارے دے اقدامات کیتن ایں سانڳے نجی شعبے دی سہولت اتے سرمایہ کاری ودھاوݨ کیتے خصوصی سرمایہ کاری سہولت کونسل دے تحت اقدامات کیتے ڳن جیندے چنڳے نتیجے نکلدے پن۔ انہاں آکھیے جو ایف بی آر اصلاحات کیتے نگران وزیرِ خزانہ، چیئرمین ایف بی آر اتے سارے متعلقہ حکام دیاں کوششاں بہترین رہین۔